Eskola-umeak dira "suteen aurrean ahulenetakoa den herritar sektorea", Suteen Prebentziorako Astea zabaltzeko ekitaldian Getxoko Udaleko Herritarren Segurtasunerako zinegotzi Josu Loroñok nabarmendu duenez. Gaurko ekimenei dagokienez, "herritar guztiak, salerosleak, ikasleak eta abar gonbidatu ditugu, simulagailura etorri eta suteak amatatzeko oinarrizko nozio batzuk ikas ditzaten. Su-itzalgailu bat zelan hartu, sute bat zelan amatatu, su-detektagailua zelan erabili bezalako oinarrizko ezagutzak, hain zuzen", azaldu du.
Egitaraua
Suteen Prebentziorako Astea dendariei zuzenduriko suteak itzaltzeko ikastaro praktiko batekin hasi da, eta jarraian, bide publikoko gertaeren segurtasunari buruzko jardunaldi teknikoa hasi da. Bestalde, bihar, 11:00etan, Areetako Andres Isasi Musika Eskolan, Lehen Hezkuntzako 4. eta 5. mailetako ikasleei zuzendutako "Dos pillos y un bombero" antzezlana eskainiko dute, eta arratsaldean, leku berean, sutearen simulazioa eta eraikina husteko jarduera izango dira, Getxoko Udaltzaingoaren, Babes Zibilaren, Ertzaintzaren, SOS Deien eta Bizkaiko Aldundiko suhiltzaileen partaidetzarekin. Urriaren 13an eta 14an, dendariei zuzenduriko ikastaro praktikoarekin jarraituko dute, eta Algortan zabalik izango da suteen simulagailua.
Suteen Prebentziorako Astea hasi da Getxo udalerrian gaur, urriaren 10ean, Udaleko Babes Zibilak, Mapfre Fundazioak eta Suhiltzaileen Teknikarien Elkarte Profesionalak antolatuta. Ekimenaren seigarren ekitaldiaren helburua, herritarrei beren burua babesteko ezagutzak ematea da. Astea salerosleei eta ikasleei dago zuzenduta, eta aurtengo ekitaldian leku publikoetako suteen prebentzioari arreta berezia eskainiko zaio. Prestatutako ekimenik erakargarrienetakoa simulagailua da, larrialdietan hezteko unitate ibiltaria, benetako sute eta kea erreproduzitzen dituena, baina kanpora isurtze kutsagarririk egin gabe. Jarduera herritar orori dago zuzenduta. Hamar minutuko saioak antolatu dira, hamar lagunekin txanda bakoitzeko, eta bertan suteak prebenitzeko eta itzaltzeko oinarrizko ezagutzak azalduko dituzte. Gaur eta bihar Areetako Bizkaiko Zubiko plazan egongo da simulagailua, 11:00etatik 14:00etara eta 17:00etatik 20:00etara. Urriaren 13an eta 14an Algortako Telletxe plazara eramango dute eta ordutegi berdina izango du. Argazkian, Loroño suteen simulagailuan / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun