Hamar urtetik beherakoentzat beste ibilbide bat prestatu dute Itxartukoek, zazpi kilometrotakoa eta errazagoa. Irteera 9:30ean izango da Algortako batzokitik abiatuta. Portu Zaharra, Ereaga hondartza, Arriluze, “La Bola” hondartza, "Puente Peligro" eta Boluetik igarota, Fadurara ailegatuko dira eta handik batzokira.
Goizean zehar eta ibilaldian parte hartzen dutenak ailegatu bitartean batzokiko pilotalekuan VI. Itxartu Pilota Txapelketaren hiru eskupilota partida jokatuko dira. Ibilaldia bukatu ondoren herri parrilladaz gozatu ahal izango da eta 13:00etan sari-banaketa hasiko da Algortako batzokiaren patioan. Sari kopuru handia eta kirol material asko banatuko dute.
Izen-ematea
Ibilaldirako izen-ematea bi eratara egin daiteke: aurreko egunetan www.itxartu.com web orrian edo bihar bertan, irteera baino lehen, batere dirurik ordaindu gabe. Partaidetza lagun bietako taldeetan izango da eta Ibilaldiaren oroigarrizko opariren bat emango zaie parte-hartzaile guztiei. Hala ere, lehenengo sailkatuak sarituak izango dira.
Algortako Itxartu Taldea kultur elkarteak XXIX. ibilaldi neurtua antolatu du biharko, asteartea, urriak 12. Urtero ibilaldi horretan parte hartzaile kopuru handia biltzen da, Algorta eta inguruko herrietatik 17 kilometroko ibilbidea egiteko. Helduak goizeko 8etatik aurrera hasiko dira ibiltzen Algortako batzokitik abiatuta eta Berangoko Kukullaga Goikoa baserritik igaroko dira, hamaiketakoa Arran hartuko dutelarik. Hortik aurrera Goikogana, Muñarrikolanda, Sustatxa, Iturgitxi Estrata eta Faduratik igaroko dira, eta Algortako batzokian amaituko dute ibilaldia. Ibilbidea zailtasun gutxikoa da eta gutxi gorabehera hiru ordu eta erdi baino zerbait gehiagotan egin ahal izango da hamaiketakoa hartzeko geldiketa kontatuz. Umeek, ordea, errazago izango dute. Eguraldia lagun izanez gero, joan den urteko partaidetza marka berdindu dutelakoan daude antolatzaileak. 1.148 lagun batu zituzten 2010an. Ibilaldiaz gain, Pilota Txapelketa ere egingo dute bihar. Argazkian, sariak banatzen aurreko edizioetako batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun