Josu Rodriguez eta Mikel de Gregoriori 4 urte jarri eta gainerakoak absolbitu egin ditu Auzitegi Nazionalak
Josu Rodriguez eta Mikel de Gregorio gazte algortarrei launa urteko espetxe zigorra ezarri die Espainiako Auzitegi Nazionalak. Irailaren 19tik 22ra epaitutako Uribe Kostako gainontzeko bederatzi mutilak, berriz, absolbitu egin dituzte, eskualdeko Amnistiaren Aldeko Mugimenduak jakinarazi duenez. Abokatuen eskutik jakin dute eta, zehaztu dutenez, "oraindik sententzia ez da publiko egin, eta ezin dugu tribunalaren arrazoiketa azaldu". Algorta, Getxo eta Berangoko hamaika gazteen kontrako epaiketaren azken saioan ETAko kide izatearen akusazioa atzera bota zuen fiskalak. Horren ordez, eta sute, mehatxu eta kalte delituak leporatuz, aurretik auziperatuentzat eskatzen zituen isunak espetxe zigor bihurtu zituen azken alegatuan, kale eraso bakoitzeko bi urteko espetxe zigorra eskatuta. Halere, lehergailuak edukitzeagatik eskatzen zuen zigorra sei urtetik laura jaitsi zuen. Argazkian, auziperatuek epaiketaren aurretik emandako prentsaurrekoa.
Gauzak horrela, haietako batzuei eskaerak handitu zieten. Espetxean dauden Jon Rosales eta Arkaitz Goikoetxearen kasuan, eskaerarik txikiena egin zuen ministerio fiskalak, bi urteko espetxe zigorra. Handiena, berriz, Mikel de Gregorioren aurka aurkeztu zuen: 12 urte. Defentsak, ordea, guztientzako absoluzioa eskatu eta gazteak haien buruen aurka deklaratzeko torturatuak izan zirela berretsi zuen. Auziari Espainiako Polizia Nazionalaren Bilboko Informazio Brigada Probintzialak 2007ko urriaren 16an egindako atxiloketekin eman zitzaion hasiera. Guztiei kale borroka taldea osatu eta 2004tik 2007ko uztailera bitarteko hamar ekintza inguru leporatzen zieten. Besteak beste, Josu Rodriguezek bi hilabete pasa eman zituen kartzelan eta Mikel de Gregoriok urte bat eta bi hilabete baino gehiago.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun