Urriaren 12a ospatzera behartuak egoteak erakusten du geure egutegi propioa osatzeko gaitasuna ukatzen jarraitzen zaigula; jai hauek erabaki eta ezartzen dituztenen aldetik ez dago inolako borondaterik jendarteak zer ospatu nahi duen eta zer ez kontuan hartzeko. Areago, urteko lan egutegiari dagozkion jai egunak ere bai, hauek ere inposaketarako baliatzen ditu espainiar Gobernuak, Patxi Lopezen eta Miguel Sanzen Gobernuekin batera, herri borondatearen gainetik eta honen aurka.
Euskal Herria nazioa da eta euskal jendarteak libre eta demokratikoki bere etorkizun instituzionala, ekonomikoa eta soziala erabakitzeko eskubide osoa du. Euskal Herrian bizi dugun une ekonomiko zein politikoak aldarrikapen hori inoiz baino ozenago egitera garamatza, gainera.
Espainia gainbeheran den une honetan, Euskal Herriko eremu politikoan garai berri bat ari da gorpuzten. Ukazioan oinarritutako ziklo politikoa behin betiko ixtearen alde, Euskal Herriaren aitortza defentsan diharduten eragile politiko, sozial eta sindikalei eskua luzatzen diegu herri honentzat oinarrizkoak diren eskubideen alde —lan egutegi propioarena kasu— indarrak batu eta aurrera urratsak egiteko, gaurko aldarrikapenak biharko erabaki izan daitezen. Gaurko politikak nola aldatzen ditugun eztabaidatzen hasteko momentua da. Benetako aldaketak bultzatu nahi ditugun eragileon arteko eztabaida irekitzeko unea da.
Inposatutako jai egunaren aurrean, lan egingo du bihar LABek; egoitza guztiak zabalik izango dira ohiko ordutegiarekin. Berton bizi gara, berton egiten dugu lan, eta geure lan egutegia berton erabakitzeko eskubidea dugu. Bada garaia inolako mugarik eta baldintzarik gabe, lan egutegiaren gaineko eztabaidari ekiteko.
LAB sindikatua
www.labsindikatua.org
Bihar, urriak 12, Hispanitate eguna, inposaketaren aurka, lan egutegi propioa aldarrikatzeko eguna dugu Euskal Herrian, eta euskal langileriari dei egiten dio LABek, aldarrikapen horrekin bat egiteko. Lan egutegiak, finean, herri baten historia, sinbologia jaso eta langileek ospatu nahi dituzten ospakizunak isladatu behar ditu. Gaur, 2011n, eta hemen, Euskal Herrian, eskubide hori ukatua dugu oraindik. Jada iragarria dugun bezala, Independentistak Sareak biharko Bilbon deitua duen martxa berdearekin bat egiten du LABek, eta bertan parte hartzeko deia luzatzen dugu. Espainiaren eskutik datorkigun inposaketa eta hondamendiaren aurka —bai eremu politikoan zein ekonomikoan, non botere ekonomikoaren eskakizunei men eginez, murrizketa gero eta gehiago eta larriagoak ezartzen ari zaizkigun—, bizi dugun testuinguruak ezin premiazkoago egiten du independentziaren aldarria. Argazkian, LABen manifestazioa Areetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun