Kossler Iberica enpresaren atzealdeko zaborra oraindik ez dutela kendu salatu du Erandioko PSE-EEk
Astrabuduako Kossler Iberica enpresaren pabilioi atzealdean pilatutako zarama oraindik ez dutela kendu jakinarazi du Erandioko PSE-EEk, orain urte eta erdi egoera "tamalgarria" zela salatu arren. Tokiko sozialisten arabera, 2010eko maiatzaren 2an argitara eman zen beste hainbat enpresek eremu hori erabiltzen ari zirela "legez kanpoko zabortegi gisa". Orubea pribatua da, baina bertara sartzerik badago: "horixe bera aprobetxatzen dute gremio askotako kamioi eta furgonetek modu erraz eta ekonomikoak hondakinak botatzeko", gaineratu dutenez. Hamasei hilabete igaro direnean, oraindik orain, "obra-hondakin zakuak, erabilitako arropa, konpresak, hodiak, zapatak, gurpilak, karrozeria hondakinak, txikitutako kristalak, apurtutako telebistak, era askotako zikinkeriak eta erretako autoentzako olio bidoiak" topa daitezke bertan, PSE-EEk salatu duenez. Argazkian, Kossler Iberica enpresaren atzealdea / © Erandioko PSE-EE.
Juan Otermin Erandioko PSE-EEren bozeramaileak gogoratutakoaren arabera, bere garaian, "esku hartuko zuela eta pabilioiaren jabeei hondakinak kendu eta orubea garbitzeko aginduko zietela iragarri zuen Hirigintza zinegotziak". Hala ere, "ez dute deus ere egin", tamaldu duenez. Hori dela eta, sozialistek Udalari berari eskatu diote premiazko neurriak hartu eta eremua garbitzea, "horren gastua jabeei jasanaraziz".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun