Leioako Euskara Zerbitzua, Berbalamiñe euskara elkartea, Lamia AEK euskaltegia eta Mastitxu udal euskaltegia dira egitasmo honen sustatzaileak. Guztien helburua, "herritar orori euskaraz bizitzeko aukera eskaintzea da, euskararen presentzia gure kaleetan eta gizartean beharrezkoa baita". "Azken aldian denon ahotan dabiltza interneteko sare sozialak. Harreman sare birtual horien balioa eta beharra ez dugu guk zalantzan jarriko, guk ere erabiltzen ditugu, baina egiatako sare sozialak, aurrez aurreko harreman sareak, atsegin badituzu eta gainera euskara praktikatuz eraiki nahi badituzu, ez duzu inon ezer klikatu behar; izena ematea besterik ez", azaldu dute.
Abantaila ugari
Mintzapraktika programa euskaraz hitz egiteko ohitura duten pertsonak euskaraz hitz egiteko ohiturarik ez dutenekin elkartzean datza. Hori dela eta, Euskal Herriko lurralde guztietako hiri, herri eta auzoetan hainbat dira martxan dauden mintzapraktika programak. Egitasmoetako partaideek EHUko kredituak eskuratu ahal izango dituzte, bidaia eta egonaldietarako deskontuak, "Aizu!" aldizkaria eta "Berria" egunkaria merkeago, eta beste hainbat abantaila.
Mintzalagunen bideoa (© AEK)
Matrikulazio kanpainarekin batera, Berbalagun programarako kanpaina berria abian jarri dute Leioako euskaltegiek, "Atsegin dut!" lelopean. Horrenbestez, 2011-2012 ikasturtean mintzapraktika programan parte hartu nahi duten guztiek eman dezakete izena jada. Berbalagun programan edozeinek parte har dezake. "Berdin dio euskaldun zaharra, euskaltegiko ikasle ohia edo euskaltegiko ikaslea izan", tokiko arduradunek azaldu dutenez. Kanpainan azpimarratu nahi dena zera da: "euskara harreman sareak sortzeko tresna ere badela". "Atsegin dut!" esamoldea interneteko sare sozialekin lotzen dugu nahitaez, azaldu dutenez. Baina, Leioako Berbalagun egitasmoaren sustatzaileen ustez, "sare sozial birtual horiez gain, euskara praktikatzea aurrez aurreko harreman sareak sortzeko era egoki bat izan daiteke. Benetako sare sozialak, alegia". Lamia AEK euskaltegian, Mastitxu udal euskaltegian eta Leioako Euskara Zerbitzuan eman daiteke izena. Argazkian, aurtengo Berbalagun egitasmoaren kartela / © Leioako Berbalagun.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun