Ikasle Abertzaleek egindako deiari erantzunda, gaur goizean dozenaka ikasle egin diote intsumisioa Hispanitatearen egunari eskualdean. Getxoko Aixerrota institutuan 50 ikasle izan dira eta Leioako Barandiaran ikastetxean beste dozena bat, IAk jakinarazi duenez. Itzubaltzeta / Romo eta Leioako Betiko ikastolak ere ateak ireki ditu. Barandiaranen, Askartza-Claret Leioako ikastetxe pribatuaren egoera aztergai izan dute. Besteak beste, zentroak Batxilergoko 2. ikasturtean D eredua urratzen duela salatu dute, hautazko ikasgai guztiak (anatomia, ekonomia, artearen historia eta literatura unibertsala) "espainolez baino ez" dituela eskaintzen esanez. Berriki, ikasleek ikasgai horiek euskaraz eskatzeko sinadura bilketa egin zuten, 70 bat sostengu jasoz. IAko kideek salatutakoaren arabera, zuzendaritzako kide batzuek sinatzaileetariko batzuk "gela batera eraman" eta "mehatxatu" zituzten. Horretaz gain, janzkeran "zentsura politikoa" egitea, kartelak jartzen debekatzea eta curriculumean Euskal Herriaren historia beharrean Espainiarena zabaltzea leporatu diote Askartzari. Bestalde, Leioako Udaltzaingoak ikasle bat identifikatu du. Argazkian, herri eskolez gain hainbat protesta izan dira eskualdean Hispanitate egunaren aurka.
Izan ere, ertzainek Barandiaranen abiatutako herri eskolak zelatatu ostean, Leioako udaltzainek hurbildu eta ikasle bat identifikatu dute, "leku publiko baten okupazioa" egotzita. "Mahai bat eta aulkiak jartzeko Udalari baimena eskatu behar" ziotela ere esan diete ikasleei, IAren pankartak kentzeko agindu ostean. Ikasleek ez dute agindua aintzat hartu eta plastikoak bertan gelditu dira. Bestalde, Turtzioz eta Trebiñu alde batera utzita, Euskal Herriko legezko bost eremu linguistikoan diren hiru eleko hezkuntza ereduak aztertu dituzte Leioan zein Getxon. Ezarri diren moduan, guztiek euskarari orduak kendu eta euskalduntzea oztopatzen dutela iritzi diote ikasleek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun