EHUko Ikasleen Kontseiluak "arazo larriak" antzeman ditu unibertsitateko campusetako garraio publikoan eta aparkalekuetan, eta horregatik, garraio publikoari buruzko txostena egitea eta garraio partekatua bultzatzeko neurriak eskatuko dizkio Euskal Herriko Unibertsitateari. Horretarako, ikasleek akordiorako proposamena aurkeztu dute, Gobernu Kontseiluak bere iritzia eman dezan. Gainera, Ikasleen Kontseiluak adierazi du arazoa "are larriagoa" dela ikasturte honetan Irakasle Eskola Leioa eta Erandioko eremuan dagoelako (2.000 ikasle gehiago), aparkalekuetako plaza ugari esklusiboki unibertsitateko langileentzat gorde dituztelako edo Donostiako Udalak TAO jarri duelako Ibaetako campusean. Argazkian, ekainaren 2an eratutako Euskal Herriko Unibertsitateko Ikasleen Kontseilua / © EHU.
Ikasleen Kontseiluaren iritziz, erakundeen arteko erabateko koordinazioa beharrezkoa da. "Gure ustez, erakunde guztiek bultzatu behar dute garraio publikoa, eta horretarako koordinazioa behar da", azaldu du Aratz Castro EHUko Ikasleen Kontseiluko buruak. Bere ustez, eskumenik ez izan arren, EHUk unibertsitateko garraioa hobetzen parte hartu behar du, eta horrez gain, koordinatu egin behar ditu horretarako ekintzak, bai eta unibertsitateko komunitatearen barruan autoa partekatzea ere. Horregatik, "Gobernu Kontseiluan ditugun ordezkarien bidez, gaur EHUko errektoreari eskatuko diogu azaroan aurkez dezan unibertsitateko garraioari buruzko txosten sakona, eta txosten berean azaldu ditzan unibertsitateko garraio publikoa hobetzeko eta garraio iraunkorra bultzatzeko Errektoretza Taldeak proposatzen dituen neurriak", gaineratu du EHUko Ikasleen Kontseiluko buruak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun