“Bluenights” izena jarri diote ostiral honetan, urriak 14, Kultur Leioak eskainiko duen jazz kontzertu txiki ereduari. Tokiko iturriek azaldu dutenez, musikari bizkaitarrek osatutako oinarrizko banda bat –kasu honetan, Leioako Travellin´ Brothers taldea– eta Espainia mailan edo nazioartean sona handia duen artista gonbidatu bat izango dira. "Ezer prestatu gabe aritzen dira, bat-batean, eta, era horretan, blues musika beltzaren benetako magia harrapatzea lortzen dute", zehaztu dutenez. Gainera, giro lasaian egonda, gonbidatuak musikan izan duen ibilbidearen berri emango du, eta musikaren mundu zoragarrian gertatu zaizkion pasadizoak azalduko ditu. Gaua amaitze aldera, artista gonbidatuak "jam session" bat gidatuko du. Mikel Azpiroz izango da Travellin´ Brothers leioaztarren gonbidatua, Elkano Browning Cream taldeko organista eta arima. Saioa 22:00etan izango da, 6 euroren truke. Argazkian, Mikel Azpiroz Elkano Browning Cream taldeko organista eta arima / © Kultur Leioa.
Pianoa ikasten sei urterekin hasi zen Mikel Azpiroz eta Donostiako Goi Mailako Kontserbatorioan burutu zituen ikasketak. Jimmy Smith eta Billy Preston bezalako maisuen soinuak erakarrita, bere soinu sorta Hammond B3 organora, Fender Rhodes eta Wurlitzer piano elektrikoetara eta sintetizadore analogikoetara zabaldu zuen. Lau Behi eta Parafunk taldeetako kidea izan zen. Jabier Muguruza, Fermin Muguruza, Matt Harding estatubatuarra eta The Waifs australiarrekin grabatzen edo birak egiten ibilia da. Bere estilo musikalean blues-ak eta ingurukoek (jazz, funk, soul…) eragin nabarmena dute, baina Afrika edo mendebaldea bezalako leku desberdinetatik datozen soinuei irekita, eklektikotasunean kokatuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun