Urriaren 17ik 29ra Kolonbiari buruzko jardunaldiak izango dira Algortan. Ekitaldiak gaur bertan hasiko dira, “Amazonia: Tradizioa eta modernitatea” erakusketaren eskutik. Horren bidez jendea sentsibilizatu nahi dute antolatzaileek Amazonas eskualdeko errealitatearen inguruan. Argazkiak eta Brasilen eta Kolonbiaren arteko mugan bizi den Ticuna herri indigenak eginiko eskulanak egongo dira ikusgai, Algortako kultur etxean, Villamonten. Horretaz gain, “Volver a nacer” dokumentala proiektatuko dute gaur toki berean, 19:00etan, sarrera dohainik. Union Patrioticaren historia aztertzen du filmak. Kolonbiako gobernuak eta FARCek 1984. urteko su-etena adostu ondoren agertu zen talde hori, gatazkari irtenbide baketsua emateko asmotan. Proiekzioa amaitu eta gero, foruma hasiko da ikusleak filmaren gaiaz mintza daitezen. Argazkian, kolonbiar dantzak / © Getxoko Udala.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
