Lutxana eta Sondika arteko tren zerbitzua berriro martxan jartzea eskatu du Erandioko Udalak
2011ko urr. 17a, 21:35
Lutxana eta Sondika arteko tren zerbitzua berriro martxan jartzea eskatu dio beste behin ere EuskoTren garraio enpresari Erandioko Udalak. Metroarekin lotura izanda, inguru horretan bizi diren herritarrek zein gertu lan egiten dutenek zerbitzua izango lukete joan etorriak baldintza ekologikoagoetan egiteko, udal iturrien arabera; ez bailukete autorik erabili behar izango. Gainera, kontuan hartzekoa da etorkizun hurbil batean beste industrialde batzuk ere eratuko direla zonalde horretan. EuskoTrenek eskaera begi onez ikusiko balu, ibilbideko geltokiak txukuntzeko neurriak hartzea "interesgarritzat" jo dute agintari erandioztarrek, bidaiariei zerbitzu duina eskaintzeko; bai eta Carrefour eta Makro merkataritza guneetatik gertu beste geltoki batzuk sortzeko aukera aztertzea ere. Hilaren 11ko bilkuran hartu zuen erabakia Erandioko Gobernu Batzarrak eta, horri jarraiki, Joseba Goikouria alkate jelkideak izenpetutako gutuna helarazi diote EuskoTreni. Argazkian, Erandioko Lutxana auzoko geltokia 2011ko irailean bota zuen Euskotren garraio enpresak. Bertan, Telmo "Zarra" Athletic-eko jokalaria jaio zen / © Erandioko Udala.Erandioko Udalak eskura dituen datuen arabera, 1995ean edo EuskoTren enpresak kendu egin zuen Lutxana eta Sondikako geltokien arteko bidaiarien tren zerbitzua, bidaiari gutxi zituelakoan. Gerora baina, Katea eta Asua inguruan hainbat industrialde egonik, horietara langile mordoa ibiltzen dela joan-etorrian, bakoitza bere autoan, eta horregatik zonalde horien inguruan aparkalekuak ere egin behar izan direla adieraziz, gaiari buruzko erabakia hartu zuen Udalbatza Osoak aspaldian, eta EuskoTreni enpresari jakinarazi zion. Horrez gain, Playabarri-D sektorea deritzan zonaldean industrialde bat garatzeko asmoa du Erandioko Udalak. Hori dela eta, Lutxana eta Sondika arteko tren zerbitzua berriro martxan jartzea eskatu dio beste behin ere garraio enpresari.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun