Getxo udalerrian erroldatutako 60 urtetik gorako norbanako edo bikoteak bizi izango dira, azaroaren lehen astetik aurrera, Algortako Zabala kaleko 3B zenbakian egokitutako babespeko 12 apartamentuetan. Orotara, lau solairu dira eta bakoitzean hiru etxebizitza daude. Horien azalera 38 eta 50 metro koadro artekoa da eta bakoitzean logela, sukaldea, komuna eta egongela daude, altzariz hornituta. Hain zuzen ere, Getxoko Udalak jarri du azken horiek erosteko dirua (50.000 euro); pisuak zaharberritu, igogailua jarri, oztopo arkitektonikoak kendu eta areto balioanitza egiteko, E Planetik jasotako milioi bat euro pasatxo erabili ostean. Guztiok erabiltzeko gelaren azalera 44 metro koadrokoa da eta han armairuak, aulkiak eta mahaiak daude astirako. Horretaz gain, Zabala kaletik errazago sartu ahal izateko arrapala ere jarri dute eta, larrialdiei begira, uneoroko konexioa daukate Udaltzaingoarekin. Argazkian, Landa babespeko apartamentuen sarreran / © Getxoko Udala.
“Etxebizitza mota hauen helburua pertsona nagusiak bere inguruan bizitzen segitu ahal izatea da, inon sartu beharrik gabe eta bere ohiko bizimoduaren antzekoena mantentzen. Aldi berean bizitza komunitarioan parte hartzeko aukera ere eskaini nahi zaie”, nabarmendu du Imanol Landa Getxoko alkateak. Babespeko apartamendu batean sartzeko udalerrian erroldatuta egotea beharrezkoa da, azkeneko bost urteotan etenik gabe edo hamabost urtez azken hogeita hamar urteetan. Gainera, eskatzaileek ez dute jabetzako etxebizitzarik eduki behar; eta edukitzekotan apartamentuen dekretuak arautzen dituen ezohiko egoeratan egon behar dute. Apartamentuetan sartu ahal izateko eskabidea eta agiriak Udaleko Gizarte Zerbitzuetan eman behar dituzte interesatuek. Udalak une honetan 51 babespeko apartamendu ditu: Algortan aipatutakoez gain, Itzubaltzeta / Romoko Lope de Vega kalean 11 eta Luis Lopez Oses kalean beste 28.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun