ETAk bere eginkizun armatuaren behin betiko amaiera iragarri du. Albiste bikaina da. Amaitu da amesgaiztoa. Azkenean, hurrengo orrialdera igaro ahal izango gara. Beldurrik gabe iratzarri, eta geroari itxaropentsu begiratu.
Bakearen ongi gorena hementxe bertan dugu. Euskadik lortu egin du. Euskadik bortxakeria makurrarazi du. Zorionak, Euskadi!
Egun garrantzitsua dugu denok. Baina horrek ez digu hainbatetan esan duguna errepikatzea eragotziko. Euskadik ez dio ETAri ezer zor. ETA da Euskadirekiko zor larria duena. Bortxazko jardunaren amaierak eraman behar du armak uztera eta taldea desegitera. Herri honekin hartu duten zorraren parte bat da.
Azken adierazpena, Euzko Alderdi Jeltzaleak ETAren komunikatuaren inguruko premiazko balorazio honetan egiten duena:
Bortxakeriari behin betiko uko egite honek Euskadin bake iraunkorrerako bidea zabaldu behar du. Adiskidetzeak eta elkartasunak aldi berria zabaltzerik izan dezaten.
Euzko Alderdi Jeltzaleak eskua luzatu nahi dio Ezker Abertzaleari, Euskadiko talde politiko eta sozial guztiekin batera, elkarrekin egin dezagun adiskidetze eta elkartasun bide hori.
Amaitu da jada ETAren, Euskadi Ta Askatasunaren aldia. Orain hasiko da askatasuna ta Euskadiren aldia.
Iñigo Urkullu: "ETAk jarduera armatuari behin betiko uzteko adierazpenaren balorazioa"
Baikor hartzen dugu ETAk jarduera armatuari behin betiko uzteko egin duen adierazpena. Aspalditik itxaroten genuen albistea da. ETAren aldetik interesatzen zitzaigun komunikatu bakarra zen; amaieraren iragarpena. Eta azkenean, iritsi egin da. Hain une hunkigarri eta garrantzitsuan, derrigorrezkoa da gogoan hartzea urteotan intolerantzia bortitzaren tributu ankerra ordaindu dutenak. Bere neke eta sakrifizioa ez da antzua izango. Gure oroimenak biktimen gogorapenarekin ondua, mendeku goserik gabeko Euskadi berria loratuko du, errespetuan eta askatasunean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun