Gaurko jai eguna ospatzen ari diren horiek ikuskizun lotsagarria eman dute azken egunotan. Batzuk gertakizunek gain hartuta ikusi ditugu, egoeraren aurrean egokitu nahian, direnak eta bi eginez; beste batzuk oztopoak jarri nahian segi dute, barregarri geratuz, ez bakarrik euskal jendartearen aurrean (horretara ohituta gauzkate), baita nazioartean ere. Bizi dugun momentu politikoaren garrantzia lerro artean irakurtzeko gaitasun eza erakutsi digute inolako lotsarik gabe, diskurtso zaharkitu eta antzuak mantenduz.
Egungo egoerak argi uzten du Patxi Lopezen Gobernuaren zilegitasun eta lidergo eza. Momentuko egoera politikoa interpretatu eta horren aurrean etorkizuneko ikuspegiz kokatzeko gaitasun eskasa erakutsi du lehendakariak.
Zoritxarrez, Gasteizko exekutiboaren ezgaitasuna aurretik ere ezaguna dugu euskal langileok; gure herria sufritzen ari den krisiaren aurrean urteotan erakusten ari den jarrera eta utzikeria dira horren erakusle.
Euskal langile klaseak gaur ez du ezer ospatzeko. Espero dugu, gainera, data hau lan egutegian gutxi batzuk gehiengo sozialaren gainetik posizio politiko bat markatzeko erabiltzen duten lehen eta azken aldia izatea.
LABek urte daramatza lan egutegi propioaren beharra aldarrikatzen, inposizio egoera hauek gainditzeko, izan ere, data jakin batzuen inguruan jai egunak inposatzean gatazka baten oinarriak azaleratzen dira, euskal herritarren gehiengoak gainditutzat eman nahi duen gatazkaren oinarriak.
Euskal Herrian, 2011ko urriaren 25ean
LAB sindikatua
www.labsindikatua.org
Gaur, urriak 25, Gernikako Estatutuaren 32. urtemuga betetzen da. Bitxia da 32 urteotan instituzioetatik kanpo bestelako ospakizunik egin ez, eta orain gure agintariek gaurko eguna jai egun izendatu izana, noiz eta hain zuzen ere, Euskal Herrian ziklo politiko berria ireki zaigunean. Hamarkadetan gure herriak sufritzen eta salatu duen ukazio eta inposaketa bere gordintasunean azaleratzen du gaur inposatua izan zaigun jai egunak. Ospakizun honek ez du zer ikusirik Euskal Herriak gaur bizi duen eszenatoki politikoaren. Gaurko ospakizunarekin inoiz baino argiago geratzen da batzuk atzera begira jarraitzen duten bitartean, Euskal Herriko jendartearen gehiengoa etorkizunari begira dagoela, ilusioz eta itxaropentsu. Argazkian, LABen manifestazioa Areetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun