Aldaketekin jarraituz, Hiri-lurren balioaren hazkundearen gaineko Zergari dagokionez, hobari berria ezarri da ezkontideen edo izatezko bikoteen mesedeetan, heriotzagatik ohiko bizitzaren eskualdatzearen kasuetan. Bai zerga honek, bai Eraikuntza, Instalazio eta Lanen gaineko Zergak (EILZ) lehengoko zenbatekoari eutsiko diote. Zerga horiek arautzen dituzten ordenantzak lau urtez aldatu barik izan ondoren, aldaketekin nahi da, "alde batetik, egungo ekonomiaren egoera larriari aurre egin, udal zerbitzuen iraunkortasuna bermatuz; eta bestetik, enplegua eta etxebizitza lortzeko neurriak sustatzeko neurri fiskalak ezartzea", udal arduradunek azaldu dutenez.
Landa Bilduren jarrerarekin pozik
Imanol Landa alkatea adostutako akordioarekin pozik agertu da eta Bildurekin zein gainontzeko alderdiekin "bide horretatik jarraitzeko borondatea" azaldu du. Halaber, adierazi duenez, “Gobernu honek mahaiaren beste alderdian akordiora iristeko borondatea duen bitartekaria aurkitzen duenean, akordioa gauzatu egiten da eta hauxe dugu horren adibide garbia”. Landak Bilduren jarrera nabarmendu du, “onartutakoa elkarrekin egindako lanaren emaitza baita". "Horretarako ahalegin handia egin dute Bildukoek, proposamen asko aztertu eta aurkeztuz. Horien bitartez iritsi ahal izan gara adostasunera eta hori guztia udalerriari onena eskaini ahal izateko helburuagaz”", amaitu duenez.
Getxoko Udalaren Ogasun Sailak hainbat zergari dagozkien ordenantzak aldatzea onartu du, EAJ eta Bilduren aldeko botoekin. Besteak beste, Ekonomia Jardueren gaineko Zergan (EJZ) %50ko hobaria ezarriko dute mugagabeko kontratua duten langileen kopurua handitzen duten enpresentzat. Hala ere, zerga-tasa ere "gaurkotu" egin dute kasu honetan, igoera (%1,20) "Getxoren biztanle maila parekoa duten udaletan ezarritakoaren batez bestekoa baino txikiagoa" dela, udal iturrien hitzetan. Bestalde, hutsik dauden etxebizitzak errentan ematea sustatzeko asmoz, Ondasun Higiezinen gaineko Zergan (OHZ) %50ko hobaria ezarri dute, Hutsik dauden Etxebizitzen Programaren harira emango diren ondasun higiezinentzako osoko kuotari begira. Bigarren zerga hori ere hazi egingo da, KPIren kopuru bertsuan (%3). Hain zuzen ere, "krisi garaian gaudela", aipatu igoeren kontra agertu dira Getxoko PP eta PSE-EE. Gauzak horrela, hainbat hobari proposatuko dituzte, "egoera larrian dauden familia asko dauzkagulako herrian". Ezustekorik ezean, gaurko osoko bilkuran onartuko dituzte behin betiko EAJk eta Bilduk proposatutako ordenantzak. Argazkian, Maitane Nerekan (Bildu), Imanol Landa (EAJ) eta Marisa Arrue (PP) Udalbatza osatzeko ekitaldian, ekainaren 11n.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun