Emakumeak izango ditu ardatz Eusko Ikaskuntzak Euskararen Nazioarteko Egunean
Eusko Ikaskuntzak historia egin duten euskal emakumeak izango ditu ardatz abenduaren 3an ospatuko den Euskararen Nazioarteko Egunean. Halaber, ENE Sariaren seigarren edizioan, euskara sustatzeko lanetan gehien nabarmendu den kanpoko erakundeari egingo zaio aintzatespena. Gaur aurkeztu da Donostian Euskararen Nazioarteko Egunaren (ENE) edizio berria. 1949an Eusko Ikaskuntzaren baitan sortutako ekimena izanik, urtero, abenduaren 3an, euskal hizkuntzaren unibertsaltasuna aldarrikatzea du xede. Aurten, Euskal Herriko historia, era batean edo bestean, markatu duten emakume guztiei omenaldia egin nahi zaie. Guztira, Euskal Herriko historiaren garai ezberdinetako eta diziplina eta jarduera eremu anitzeko 44 emakume aukeratu dira. Emakume horiek dira Kukuxumusuk egun berezi horri begira diseinatutako kamisetaren ardatz nagusia. Argazkian, gaurko aurkezpena / © Eusko Ikaskuntza.
Parte hartzea sustatu nahian, lehiaketa erraz bat abian jarri da. Eusko Ikaskuntzaren webgunean sartuz (www.eusko-ikaskuntza.org/ene), kamisetan azaltzen diren lau emakumeren inguruan galdera errazak planteatu dira. Abenduaren 2a baino lehen zuzen erantzuten dutenen artean, elastikoen zozketa egingo da. Bestalde, seigarren urtez jarraian ENE Sariaren edizio berri bat ospatuko da, eta aintzatespena egingo zaio euskara sustatzeko lanetan gehien nabarmendu den kanpoko erakundeari. Saria aitorpen publikoa eta Nestor Basterretxeak ENErako diseinatu zuen anagramaren burdina eta altzairu herdoilgaitzezko erreprodukzioa dira. Azaroaren 25ean amaituko da hautagaiak aurkezteko epea, eta Euskararen Nazioarteko Egunean, abenduaren 3an, jakinaraziko da epaimahaiaren erabakia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun