Uribe Kostako Mankomunitateko Osoko Batzordearen eraketa baliogabetzea eskatu du Sopelako PSE-EEk
Uribe Kostako Mankomunitateko Osoko Batzordearen eraketa eta horrek hartu zituen erabakiak "baliogabetzat" jo ditu Sopelako PSE-EEk, bilerara aipatu udalerriko sozialisten ordezkaria deitu omen ez zutelako. Maria Teresa Fernandezek ohartarazitakoaren arabera, "berriro egin beharko da aipatu gobernu organoaren zein eratutako lan batzorde ezberdinen osaketa, parte-hartze politikoa bermatzeko, partaide guztien eskubide konstituzionalak errespetatuz". Horrela egiten ez badute, administrazioarekiko auzi prozesua zabalduko dutela adierazi du Fernandezek. PSE-EEko zinegotziak zehaztu duenez, Sopelako Udalak aukeratu zuen ordezkari Mankomunitatean, beste hautetsi eta Saioa Villanueva Bildu koalizioko alkatearekin batera. Urriaren 14ko batzarrean Anabel Landa Berangoko alkate jelkidea izendatu zuten erakundeko presidente eta Arantza Etxeberria Gorlizko alkatea presidenteorde. Azken hori EAJkoa ere bai. Argazkian, Maria Teresa Fernandez Sopelako PSE-EEko zinegotzia / © PSE-EE.
Lehenengo bilerarako deialdia jasota, hurrengo batzarren berri emateko helbidea zein e-posta eman ei zien tokiko arduradunei Fernandezek. Urriaren 14ko bilerara, ordea, ez zutela deitu dio sozialistak, "Mankomunitateko estatutuak zein Herri Administrazioen Araubide Juridikoaren eta Administrazio Prozedura Erkidearen Legea urratuz".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun