Atzo ospatu zen Leioako Egunaren 485. urteurrena, Artatza jauregian. Ekitaldian izan ziren, besteak beste, herriko elkarte kulturalak, kirol taldeak, ikastetxeetako ordezkariak, herritarren elkarteak, auzoetako kultur aretoak eta enpresak. Udal iturriek aipatutakoaren arabera, "bertan Leioako herrian eta herriarentzat lanean dihardutenak elkartu ohi dira eta leioaztarren arteko harremanak estutzeko balio duen momentua da". Aurtengo saritua Juan Antonio Aresti Olamendi izan da. Jatorriz txistularia da, baina segituan konturatu zen bere benetako bokazioa aurreskua zela. Herriko txikiei euskal dantza eskolak ematen hasi zen, San Joan Bataiatzaile parrokiaren lokaletan edota, Lamiakoko Auzokide Elkartearen eskariz, San Maximo parrokian. 70eko hamarkadan Euskal Dantzarien Biltzarraren sortzaileetako bat izan zen, horrek suposatzen zuen konpromisoa eta arriskua onartuz. Frankismo osteko lehen Udalbatza osatu zenean Leioan, bera izan zen lehenengoko aurresku hori dantzatu zuena. Argazkia: © Leioako Udala.
"Ezin dugu ahaztu bera izan zela, hainbat ikerketa egin ostean, Leioako elizateko aurreskuaren ohitura berreskuratu zuena. Pertsonai ezaguna dugu Juan Antonio Aresti Leioan, eta aldi berean asko zor diogu. Hori dela eta herriaren esker ona irabazi dute sarritan, adibidez, 2006an jaietako pregoilaria aukeratuz", gaineratu dute Udaletik. Gaur egun euskal dantzen munduan jarraitzen du murgilduta, eta nola ez, irakasten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun