"Audientzia Nazionala gerra auzitegi bat dela argi esan nagi dugu", adierazi dute gaurko kontzentrazioan. "Konponbide garai berri honetan, mota honetako epaiketak lekuz kanpo daudela ulertzen dugu eta, epaiketari gaitzespena eta atxilotu zein senideei elkartasuna adierazteko, azaroaren 4an, ostirala, 20:00etan, Telletxen egingo den elkarretaratzera deitzen zaituztegu", gaineratu dutenez. Bitartean, Egin Dezagun Bidea ekimeneko Algortako Herri Bilguneko kideek azaldu dutenez, udara arte egin bezala, Etxerat elkarteak herriko eragile eta elkarteen esku utzi ditu hileko azken ostiraletako deialdiak, "presoen eskubideen babesa herriari dagokiola" uste dutelako. Euskal preso eta errepresaliatu politikoen eskubideak babesteko konpromisoa adierazten duen kinkea eragile batetik bestera igaroko da hilabete bakoitzeko azken ostiralean, hurrengo deialdia iritsi arte. Tartean, hilabete oso bat izango du dagokion elkarteak, horren alde lan egiteko.
Behartutako erruztapenak
Algorta, Getxo eta Berangoko 11 gazteen aurkako auzian haietako 9 absolbitu eta bi zigortu zituztela zabaldu zen orain hiru aste. Josu Rodriguez eta Mikel de Gregoriori 4 urteko espetxe zigorra ezarri zien Espainiako Auzitegiaren autoa, berriz, hilaren 13an egin zen publiko. "Bake soziala hankaz gora jartzeko helburuz lehergailuak egiteko tresnak" gordetzea egozten diete biei. AAM-k, Eleak mugimenduak eta baita absolbitutako auziperatuek ere gogor kritikatu dute epaia. AAMren ustez, "tribunalak tortura balioetsi" du. Izan ere, Josu Rodriguez eta Mikel de Gregorioren kasuan, "torturaz eragindako informazioaz baliatu izanari balio juridikoa eman dio, horien bitartez, hainbat akusazio-elementu aurkitu bide zutelako".
Arkaitz Goikoetxea, Iñigo Gutierrez eta Aitor Cotano preso politiko getxoztarrei dagokionez, azaroaren 2, 3 eta 4an epaituko dituzte Espainiako Auzitegi Nazionalean, Uribe Kostako Amnistiaren Aldeko Mugimenduak zabaldu duenez. Fiskalak 8 urteko espetxe zigorra eskatzen du hirurontzat, Getxoko estrata batean Ertzaintzak aurkitu zuen leherkariz betetako garagardo kupela beraiena zela egotzita. 2008ko urtarrilaren 31ko eguerdi hartan, barril barruan 30 kilo inguru lehergai zeudela adierazi zuen Eusko Jaurlaritzako Herrizaingo Sailak; baita "ETAko kideen arteko material entrega" bat zela ere. Akusazio hori, ordea, "inkomunikazioan egindako torturez sinarazitako deklarazioan soilik" oinarritzen dela salatu du, beste behin ere, errepresioaren kontrako erakundeak.
Bitartean, Imanol Beristain orain urtebete, 2010eko urriaren 22an atxilotu zuen Espainiako Polizia Nazionalak Segiko Uribe Kostako arduraduna izatea leporatuta. Bost egun beranduago, itzubaltzetarrak tratu txar fisiko zein psikologikoak pairatu zituela salatu zuen Amnistiaren Aldeko Mugimenduak. Harrez gero, prebentibo egoeran daukate Alcala espetxean, Getxotik 413 kilometrotara.
Egin Dezagun Bidea ekimenarekin bat eginez, 225 bat gizon-emakume elkartu da gaur iluntzean Algortako Telletxe plazan, euskal preso eta iheslari politikoen eskubideak aldarrikatzeko asmoz. San Nikolas ikastolako langileek egin dute oraingo honetan hileko azken ostiraleko kontzentraziorako deialdia. Izan ere, urriaren 22an bete zen urtea Espainiako Polizia Nazionalak beraien lankide Imanol Beristain atxilotu zuela. Euskal errepresaliatuekiko elkartasuna adierazten duen kinkea irailean epaitutako Uribe Kostako 11 gazteen eskutik jaso dute ikastolako langileek. Hain zuzen ere, hilabete honetan bertan eman du ezagutzera Espainiako Auzitegi Nazionalak horien aurkako sententzia: mutiletatik 9 absolbitu, baina Josu Rodriguez eta Mikel de Gregorio algortarrei 4 urteko espetxe zigorra jarri diete. Elkarretaratzean salatu dutenez, "Auzitegi Nazionalak tortura balioetsi" du. Izan ere, gazte bien kasuan, "torturaz eragindako informazioaz baliatu izanari balio juridikoa eman dio, horien bitartez, hainbat akusazio-elementu aurkitu bide zutelako". Algortako hiru preso gaztek azaroaren hasieran izango duten epaiketa testuinguru berean kokatu dute: Arkaitz Goikoetxea, Iñigo Gutierrez eta Aitor Cotanori "24 urteko espetxe zigorra eskatzeraino heldu dira, Guardia Zibilaren esku pairatutako tratu txarren ondorioz ateratako autoinkulpazioetan oinarrituta". Epaiketa berri hori salatzeko, azaroaren 4an elkarretaratzea izango da Telletxen, 20:00etatik aurrera. Ildo berean, Jone Lozanori Lyon-Corbaseko kartzelariek emandako "jipoia" salatu dute. Bestalde, Itzubaltzeta / Romon, 100 bat auzokidek eskatu du Imanol Beristainen askatzea. Argazkian, jakinarazi dutenez Arkaitz Goikoetxea, Iñigo Gutierrez eta Aitor Cotano epaituko dituzte azaroaren hasieran.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun