Azaroaren 19an, larunbata, Nazioarteko Trikitixa Jaialdia egingo du hamargarrenez Bizkaiko Trikitixa Elkarteak. Hitzordua arratsaldeko 7etan jarri dute Areetako Andres Isasi musika eskolan. Festa horretan instrumentua jotzeko era eta estilo ezberdinak erakutsi nahi dituztela jakinarazi dute antolatzaileek, "baita trikitixa (tresna) munduan zehar beste musika tresna batzuekin zelan uztartzen den ere". Horrenbestez, aurtengo artistak ondokoak izango dira: Bieito Romero, Xan Cerqueiro eta Diego Barral (Galizia); Guillem Anguera, Hector Beberide eta Isidre Sans (Kataluinia); eta Kris eta Xabi Solano; Kepa Junkera eta Jose Luis Canal; eta Urtzi Enrikez eta Marc del Pino (Euskal Herria). Sarrerak egunean bertan erosi ahal izango dira Andres Isasiko leihatilan. Aldez aurretik, BBK eta Algortako kultur etxearen bitartez eskuratu ahal izango dira, 8 eurotan. Trikisession-erako sarrera librea da. Argazkian, Xabi Solano ere izango da Kris bere arrebarekin batera / cc-by-nc-sa Saioa Cabañas - Gauilunak.
Besteak beste, Euskal Herriko, Galiziako eta Herrialde Katalanetako musikariak izango dira. Horrela, Bizkaiko Trikitixa Elkarteak lantzen dituen hiru ildoak batera jorratuko ditu aipatu jaialdiak. Batetik, irakaskuntza landuko dute; aipaturiko musika tresna, estilo eta jaialdian joko duten trikitilariak ezagutzera emanez. Bestetik, trikitixa bera sustatzen da. Izan ere, "jaialdi hau edozein publikori zuzentzen zaio (trikitixa ikasleei, trikitixa irakasleei, trikitixa eta orokorrean musika zaletuei, folklore zaleei, umeei, helduei... )", Bizkaiko Trikitixa Elkarteko kideek azaldu dutenez. Jaialdia bukatu ostean, urteroko Trikisession-a ospatuko da Areetako Glass tabernan. Bertan, jaialdian parte hartuko duten musikariek batera jotzeko, inprobisatzeko, aukera izango dute, era informalago batean. Glass-eraino hurbiltzen diren musikari eta zaleek ere beraiekin batera jo, kantatu eta dantzatu ahal izango dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun