Polizia operazioa abuztuan abiatu zen, Gorlizko etxebizitza batetik kokaina saltzen omen zuten 34 eta 24 urteko senar-emazte kolonbiarrak antzeman zituenean Ertzaintzak. Bi urtez, droga, “Manolos” izeneko zapatetan itxura emanda Kolonbiatik ekartzen zebiltzala ondorioztatu zuten poliziek, ikerketen bitartez. Baita gizona sareko "burua" zela ere. Herrizaingo Sailak dioenez, bera arduratzen zen Kolonbian kokaina ematen zioten pertsonekin harremanetan jartzean eta, bikotekidearekin batera, hegazkinez droga ekartzen zuten pertsonak bilatzeaz. Gurean, 29 urteko gizonezko bat, espainiar nazionalitatekoa, zen banatzaile nagusia; Kolonbiako 38 eta 28 urteko bi pertsonen laguntzaz.
Atxiloketak
Joan den ostiralean, urriak 28, sareko buruak eta bere emazteak azken droga bidalketa jaso eta, hori salduta, Kolonbiara bueltatuko zirela igarri zuten poliziek. Hori dela eta, ustezko bi laguntzaile kolonbiarrak atxilotu zituzten Zierbenako Arena auzoan, A-8 autopistatik jarraika ibili ostean. Horiei sareko buruak emandako kokaina kilogramo bat hartu ei zieten. Asteburuan zehar, ustezko burua eta bere emaztea harrapatu zituzten Sopelan; eta banatzaile nagusia omen zena Santurtzin.
Azkenik, azaroaren 1ean, Bartzelonako Prat aireportura joan ziren ertzainak, Guardia Zibilarekin batera, Kolonbiatik zetorren 27 urteko emakumea atxilotzeko. Herrizaingo Sailaren arabera, bideo-jokoen kontsola bi, bozgorailuak eta kablerik gabeko routerra zeramatzan ekipajean. Eta horien barruan kokaina hiru kilo, polizia iturriek diotenez.
Ertzaintzak eta Bartzelonako Prat aireportuko Guardia Zibilak sei lagun atxilotu dituzte Uribe Kosta eskualdean, itsasadarreko bi ibarretan eta Bilbon kokaina saltzea egotzita. Atxilotuetako bi, senar-emazteak, Gorlizen bizi dira eta Sopelan atzeman dituzte. Eusko Jaurlaritzaren Herrizaingo Sailaren arabera, "nazioarteko trafiko sare garrantzitsu bat" osatzen zuten ustezko gaizkileek, droga Kolonbiako "Cali hiritik bertatik" ekartzen baitzuten. Getxoko 3. instrukzio epaitegiak zuzendutako polizia operazioaren bitartez, Bilbo aldean zebilen "droga trafiko sarerik aktiboena" desegin omen dute. Bi urtez ei zebiltzan kokaina ekartzen, modu ezberdinak erabiliz. Antza, Manolo Blahnik ospe handiko zapata diseinatzailearen modelo baten itxura emanda eramaten zuten droga Kolonbiatik Bartzelonara hegazkinez. Zapata pareak 50.000 euro balio du gutxi gorabehera. Hori dela eta "Manolos" izena eman diote polizia operazioari. Gaineratu dutenez, lau kilo kokaina atzeman dituzte eta sei pertsona atxilotu dituzte, horien artean bost kolonbiarrak dira eta beste bat espainiarra. Argazkian, beste droga operazio baten artxiboko irudia / © Herrizaingo Saila.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun