Herritarrentzako gomendioak:
Prebentzioko neurriak:
• Ez utzi ibilgailurik eta ez akanpatu ibilgu lehorretan edo ibaien ertzetan. Gerta liteke urak bat-batean gora edo gainezka egitea.
• Kendu ibilgailuak ur-putzuak sor daitezkeen inguruetatik eta urpetu daitezkeen garajeetatik.
• Ahal baduzu, ez hartu autoa.
• Bidaiatu beharra baduzu, ahal duzula, ibili errepide nagusi eta autobideetatik, eta ikusi ezinik bazabiltza, gelditu leku segururen batean.
• Erretiratu urak eramateko moduko gauza guztiak, batez ere, kutsadura eragin dezaketen produktu arriskutsuak.
• Begiratu inguruko hustubideak ondo dauden.
• Irteerak mendira eta kanpoan antolatutako txangoak saihestu.
Larrialdietan hartu beharreko neurriak:
• Urrundu erreka, uhar, zubi edo urpean gera daitezkeen lekuetatik, eta ez saiatu urak hartutako lekuetatik pasatzen, ez autoz ez oinez: urak indar handia dauka eta eraman egin zaitzake. Ura dela-eta autoa errepidean ez aurrera ez atzera geratzen bazaizu, itzali argiak eta irten autotik.
• Mendi-magaletatik eta muino-magaletatik urrun egon; ura, harriak eta lohia amil daitezke-eta.
• Ura etxebizitzara sartuko balitz, alde soto eta behe-solairuetatik albait azkarren.
• Etxea utzi beharra badaukazu, itzali argindarra eta itxi gasa eta ura. Gainera, utzi ohar bat ostatua non hartuko duzun adierazteko.
• Jo leku altuenetara; saihestu urpean gera daitezkeen lekuak.
• Jakinaren gainean egon beti, irratiz edo bestela, jakiteko egoera zertan den eta eguraldiaren iragarpenak zer dioen.
Larunbat eta igandean euri-jasak iritsiko direla eta iragarritako alerta laranjaren harira, Eusko Jaurlaritzaren Herrizaingo Sailak agindu dituen neurriak betetzea gomendatu du Getxoko Udalak. Hori dela eta, Imanol Landa alkateak udal Larrialdi Plana abiatu du, 0 egoeran. Besteak beste, ibai ertzetatik, ur-putzuak sor daitezkeen inguruetatik eta urpetu daitezkeen garajeetatik ibilgailuak kentzea aholkatu dute tokiko arduradunek; "urak bat-batean gora edo gainezka egitea gerta litekeelako". Bestalde, ura etxebizitzara sartuko balitz, soto eta behe-solairuetatik albait azkarren alde egitea eskatu dute. Larrialdiren bat izatekotan, 944 660 202 edo 112 telefono zenbakietara deitu beharko da. Argazkian, 2008ko ekainaren 1ean izandako uholdeen irudietako bat
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun