Urkulluren aurretik, Josu Erkoreka Madrileko Kongresurako hautagaiak hitza hartu zuen. Egun diputatu denak azaldu zuen “EAJk ibilbide luzea” daukala Madrilgo Gorte Nagusietan. 1918an joan ziren lehenengoz, Kongresura eta Senatura, ordezkari jeltzaleak. Ia mende oso bat pasa da harrez gero. "Laurogeita hamahiru urte. Denbora asko da. Baina orduan eta gaur, helburu berbera daukagu: Euskadiren alde lan egitea; Euskadiren defentsan aritzea. Gure herria aurrera ateratzea”, adierazi zuenez.
Iñigo Urkulluren hitzak Areetako mitinean (© EAJ)
Dozenaka jeltzale batu ziren larunbat arratsaldean Areetako Xake plazan jarritako karparen pean. Ekitaldi politikoan Iñigo Urkullu EAJren EEBko presidenteak adierazi zuenez, “Euskadik bakea nahi du, bakea behar du, bakea merezi du. Herri honek itxaropen berri bat dauka, aurrera begiratzeko, aurrera egiteko. ETA atzean utzi eta elkarbizitza berri bat eraiki. Hori da Herri honen ametsa, nahia eta aldarria. Hori da, Euzko Alderdi Jeltzalearen lehendabiziko helburua”. Azpimarratu zuenez, “Euzko Alderdi Jeltzaleak ez ditu urte hauek alperrik galdu. Lanean egon gara. Egunean egunea bidea jorratzen. Gure aberria eraikitzen eta gizarteari aukera berriak eskaintzen. Euzko Alderdi Jeltzalea nazio eraikuntza da. Eta izango da”. Argazkian, Urkullu eta Erkoreka Areetako mitinean / © EAJ.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun