Iñaki Prego Metro Bilbaoko kontseilari ordezkariak azpimarratu zuenez, Zuzendaritzak uztailaren 11an langileekin hitzartutako akordioa betetzeko "asmo sendoa" izan du "une oro". Akordio horren arabera, enpresak 166 langile berri kontratatu behar zituen trenak gidatzeko eta beste 182 lagun geltokien ikuskaritzarako. Hori dela eta, Lan Ikuskatze erakundea edo "bestelako erakunde publikoa" bitartekari izateko proposamena luzatu zien sindikatuei. Pregok adierazi zuenez, "bi aldeen artean adostutako bitartekaria" izan beharko da eta behin bitartekariaren erabakia izanda, "aitzakiarik gabe" betetzeko hitza eman zuen. Zuzendaritzak argitu zuenez, "horretarako baldintza bakarra deitutako mobilizazioak bertan behera uztea izango da".
Bizkaiko herritarrak hizpide
Metroko arduradunak sindikatuak Bizkaiko herritarrei "aurrekaririk gabeko zigorra" ematen ari zaiela salatu zuen eta akordioa ezin dela erabiltzaileei "kalteak" sortzearen eraginez adostu. Pregok ziurtatu zuenez, metroko zuzendaritzaren borondatea agerian geratu da "Enpresa Batzordeari iragarritako kontratazioekin" eta Basauriko geltokiaren irekiera baino "lehenago sartu behar zuten guztiak" joan den astelehenean sartu zirela azaldu zuen, nahiz eta urriaren 31n Jaurlaritzako Ikuskaritzan greba deialdia aurkeztu "uztailaren 11n adostutako langileen akordioa eta Metro Bilbaoko barne araudia" ez dela betetzen argudiatuta.
Metro Bilbaoko arduradunak azpimarratu zuenez, sindikatuek "ez dute lanpostu kopuruak areagotzearen inguruan erreferentziarik egin, kontratatu beharreko pertsonen inguruan baizik". Hala eta guztiz ere, lan-harremanen kontseiluari inpartzialtasunez jokatuko duen kanpoko agenteren batek gatazka bitartekotza egin zezala eskatu ziotela esan zuen, "akordioa bete den ala ez balioztatzeko", baina sindikatuek "ezezkoa" eman zutela erantsi zuen.
Metro Bilbao garraio enpresako zuzendaritzak sindikatuekin adostutako ituna interpretatzeko bitartekari bat proposatu zuen atzo. Horrela, bitartekaritza horrek erabakitakoa "aitzakiarik gabe" betetzera hitza eman zuten konpainiako arduradunek. Baldintza bakarra sindikatuek biharko greba bertan behera uztea da. Hori, baina, ez dute lortu. 9:30etik 12:30era aurreikusita dago geldialdia. Are gehiago, atzo goiz zein arratsaldez egindako batzarretan hilaren 23an eta 30ean ere greba egitea erabaki zuten 60 beharginek baino gehiagok. Enpresa batzordearen arabera, "berandu" dator eta "lekuz kanpo" dago bitartekaritza eskaintza. Hala ere, ez dituzte ateak erabat itxi: "astelehenean" aztertuko dute eskaintza. Langileen ordezkarien ustez, kontratazioei buruz uztailaren 11n hitzartutakoa "betetzeko asmorik ez" dauka zuzendaritzak. Argazkian, metroko langileen protesta artxiboko irudian / © LAB Metro Bilbao.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun