Leire Pinedo Ekonomia eta Ogasun zinegotziak eta Bilduko bozeramaileak azpimarratu duenez, "krisia luzatzen doa eta Udalak zerbitzu publikoak bermatu behar ditu. Udalerako diru-sarrerarik nagusiena Bizkaiko Foru Aldundiak Udalkutxaren bitartez egiten duena da, eta 2012rako gure Udalerako aurreikusitako kantitatea 2008rako onartutakoa baino baxuagoa da. Sopelak 4 urte daramatza, 2008tik, diru-sarrera beretsuekin, eta zerbitzuak geroz eta handiagoak dira. Ondorioz, ezin dugu gaitasun ekonomikoa galtzen jarraitu lehen beharrekoak diren zerbitzuak eskaintzen jarraitzeko".
Esan bezala, Ondasun Higiezinen Gaineko Zergak 1,13tik 1,16rako igoera izango du. Horrek %2,8ko igoera dakar, Kontsumo Prezioen Indizearen igoeraren harira. Neurri horrekin, udal diru-sarrerak 100.000 euro inguru igoko dira. Pinedok esan zuenez, "proposamen neurtu eta errealista da, udal zerbitzuak bermatzeko hartutakoa". Hala ere, ordainagiriaren kantitatea 10 euro baino baxuagoa den kasuetan ez da ordaindu beharrik egongo. Lehen 30 eurotik behera ezarrita zegoen muga.
Gehien dutenek gehiago ordaindu
Trakzio mekanikodun ibilgailuen gaineko zergaren kasuan, bataz besteko %3ko igoera onartu zen. Igoera hori mailakakoa izango da eta ibilgailuaren zilindro-bolumenaren arabera ezarriko da. Horrela, zilindro-bolumen gutxiagoko ibilgailuek, 12 eta 17 zaldi fiskal bitartekoak, %1eko igoera izango dute. Bere aldetik, zilindro-bolumen handiagoko ibilgailuei %5-7ko igoera ezarriko zaie. Halaber, gutxien kutsatzen duten ibilgailuek hobariak izango dituzte: CO2 gutxien isurtzen dutenek %50eko jaitsiera izango dute eta ibilgailu elektrikoek %75ekoa. Pinedok adierazi zuenez, lehen "ez zen berdintasunezko banaketa egiten, altua zen zilindro-bolumen gutxiagoko ibilgailuentzat eta baxua zilindro-bolumen handiagokoentzat. Horrela, zilindro-bolumen gutxiagoko ibilgailuentzat zegoen tarifa Getxoko Udalekoa baino altuagoa zen. Kontua ez da dirua biltzea, biltzeagatik. Kontua da gehien dutenek gehiago ordaintzea".
Sopelako Udaleko 2012rako zergak eta tasak urriaren 27ko osoko bilkuran onartuak izan ziren. "Gehienak ez dira igoko. Batzuk Kontsumo Prezioen Indizearen (KPI) arabera eguneratuko dira", tokiko iturriek nabarmendu dutenez. Hori egin da, hain zuzen, Ondasun Higiezinen gaineko Zergarekin (OHZ), Trakzio Mekanikodun Ibilgailuen gaineko Zergarekin (TMIZ) eta hondakin trinko-organikoen biltze eta kudeaketaren gaineko tasarekin. OHZk %2,8 gora egingo du, baina ordainagiriaren kantitatea 10 euro baino baxuagoa bada ez da ordaindu beharko. TMIZ, berriz, bataz beste, %3 handituko dute. Biak Bilduren aldeko botoekin, EAJ eta PSE-EEren abstentzioarekin eta PPren kontrako botoarekin onartu ziren. Hondakin trinko-organikoen biltze eta kudeatzearen gaineko tasari dagokionez, %4ko igoera izango du. "Neurri horrekin zerbitzuaren %97 estaltzen da, tasa bere kostura parekatuz", udal iturriek azaldu dutenez. Igoera hori Bildu eta EAJren aldeko botoekin, PSE-EEren abstentzioarekin eta PPren aurkako bozarekin onartu zuten. Gainontzeko zerga eta tasetan ez da igoerarik izango. Argazkian, Bildu da egun Sopelako Udalaren buru / © Sopela.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun