Getxoko Udaltzaingoak 42 urteko gizon bat atxilotu zuen larunbat goizaldean bere bikotekidea erasotzea egotzita. Gertaera, ostiralean, 22:50ak aldera izan zen, udal iturrien arabera. Algortako etxebizitza batean emakume baten kontrako eraso bat gertatzen ari zela ohartarazi zuten Udaltzaingoaren Koordinazio Gunean. Bertara helduta, gizon batek emakumea jotzen ikusi zutela adierazi zieten hainbat lekukok poliziei. Aipatu lagunek gizonari ekintza erantzuki zioten, baina ez omen zien kasurik egin. Polizia heldu aurretik alde egin zuen ustezko erasotzaileak etxetik. Etxera sartuta, emakumezkoak kolpe zantzuak zituela ikusi eta anbulantzia batek Gurutzetako ospitalera eraman zuen, agenteek lagunduta. Ustezko erasotzaileari dagokionez, udaltzain batek birritan hitz egin zuen berarekin telefonoz, poliziaren egoitzara joateko eskatuz, baina ez zion jaramonik egin. Larunbatean, goizeko 4ak aldera, udaltzainek biktima etxera lagundu zutenean, gizona ohean lo egiten aurkitu omen zuten. Une horretan atxilotu eta epailearen esku utzi zuen, udal iturriek aipatu dutenez. Argazkian, Algortako Bilgune Feministaren protesta bat.
Gertaeraren aurrean, Keltse Eiguren Berdintasun Zerbitzuko zinegotziak bere gaitzespen osoa agertu du eta gogoratu du “berdintasunaren alde lan egiten segitzearen beharra, indarkeria emakume eta gizonen arteko desberdintasun estrukturalean oinarritzen baita”. Era berean, udal arduradunak gogoratu du Gizarte Zerbitzuen udal alorrak (944 660 151) aholkularitza juridiko eta arreta psikologiko zerbitzuak errazten dituela; baita Eusko Jaurlaritzak tratu txarren biktimentzat duen telefonora (900 840 111), Udaltzaingora (944 660 202), Ertzaintzara (944 063 420) eta SOS Deiak zerbitzura (112) ere jo daitekeela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun