Areetako Andres Isasi Musika Eskolak bihar, asteartea, hartuko du zentroaren 25. urteurrena ospatzeko ekitaldietan lehenengoa. Errezitaldian bertoko taldeek parte hartuko dute: Korapilo fanfarrek, Camerata Hamaika txirula taldea, helduen abesbatza, Andres Isasi hari orkestra eta Andres Isasi akordeoi taldea, hurrenez hurren. Asteazkenean, berriz, irakasleen kontzertua izango da eta honako hauek arituko dira: Patxi Azurmendi biolin-jotzailea eta Maria Eugenia Martinez piano-jotzailea; Nuria Busto eta Mario Clavel txirula-jotzailea, eta Pia Rojas piano-jotzailea; Imanol Ormazabal kantaria eta Luminita Duca piano-jotzailea; eta Ibon Perez del Palomar txirula-jotzailea eta Marisa de Icaza piano-jotzailea. Errezitaldi guztiak 19:30ean hasiko dira eta sarrera doan izango da, ostegunekoa (hilak 17) salbu, gonbidapen-txartela beharko baita. Argazkian, Joxean Llorente eskolako zuzendaria eta Josu Loroño zinegotzia, urteurren ekitaldien aurkezpenean / © Getxoko Udala.
Ostegunean, azaroak 17, ospakizunaren ekitaldi nagusia izango da eta bertara gizarte getxoztarreko agintari eta ordezkariak bilduko dira. Egun horretan omenaldia egingo zaio Andres Isasi musikagileari: zentroaren historiari buruzko ikus-entzunezkoa eskaini eta 1986an Andres Isasiren familiak emandako pianoa “berrinauguratuko” dute, Mario Lerena (piano-jotzailea), Javier de Solaun (tenorea) eta Toru Kannari-ren (gitarrista) kontzertuarekin. Besteak beste, Andres Isasik berak konposatutako eta Mario Lerena musikologoak berreskuratutako zortziko ezezaguna interpretatuko dute. Kontzertuak barikuan, hilaren 18an, amaituko dira musika bandaren, musikoterapiako ikasleen, Jone Mintegia piano-jotzailearen eta La Bossa Nostra jazz taldearen eskutik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun