Aralarrek gogoratu du ekimena aurkeztu zuela Legebiltzarrean prozedura kriminaleko legea aldatua izan zedin eskatzeko, eta Amnesty Internationalek eskatu bezala, inkomunikazioa bertan behera utzia izan zedin. Izan ere, inkomunikazioa indarrean dagoen bitartean, tortura izango da. Eta hori da behin eta berriro esan diona Espainiako Estatuari Amnesty Internationalek.
Portu eta Sarasolaren kasuarekin agerian geratu da neurtzeko bi baremo oso ezberdin erabiltzen dituela Espainiako Estatuak. Horregatik, behar-beharrezkoa deritzo edozein giza eskubideren urraketaren aurrean eskubide guztiak bermatzea pertsona guztiei, horrela bakarrik lortuko delako benetako bake iraunkorra, eta horrela bakarrik gaindituko direlako gatazkaren ondorioak.
Auzitegi Gorenak Igor Portu eta Martin Sarasola torturatu zituzten guardia zibilak absolbitzea erabaki ondoren, torturatzaileei beste behin inpunitatearen mezua eman zaiela salatu du Aralarrek. Zentzu horretan, Aralarrek gogoratu du Gipuzkoako Audientzia Probintzialak frogatutzat eman zuela Portu eta Sarasola torturatuak izan zirela atxilotu zituzten unean, eta ez du ulertzen eta erabat gaitzesgarria deritzo torturatzaileak zigor gabe uztea. Espainian torturatu egiten denaren froga nabarmena izan zen Gipuzkoako Audientzia Probintzialak hartutako erabakia, baina, beste behin, Espainiako Estatuak nahiago izan du beste aldera begiratu eta torturatzaileei erabateko inpunitatearen mezua eman, beren jarrera bortitzekin eta giza eskubideak urratzen jarraitu ahal izateko. Argazkian, Portu eta Saraolak pairatutako torturak salatzeko egindako agerraldia / cc-by-nc-sa Nafarroan.com.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun