Esan bezala, hauteskunde hauetan EHUk boto elektronikoa erabiliko du lehenengo aldiz, lau ikastegitan —Letren Fakultatea, Psikologia Fakultatea, Medikuntza eta Odontologia Fakultatea eta Bilboko Ingeniaritza Goi Eskola Teknikoa— ikasleek eta irakasle eta ikertzaile iraunkorrek aipatu sistema baliatuko baitute. Graduondoko ikasleek ere elektronikoki bozkatuko dute eta aipatu lau ikastegietako ikasleek sistema horren bidez aukeratuko dituzte Ikastegiko Batzarreko ordezkariak.
Erraza eta intuitiboa
EHUk aukeratutako boto elektronikoko sistema oso erraza eta intuitiboa da, unibertsitateko iturriek aipatu dutenez. Aldez aurretik boto-emailea identifikaturik egotea (bai sinestamenduaren bidez —errolda elektroniko osoari banatu zaizkio sinestamendu pertsonalizatuak—, DNI elektronikoaren bidez, edo, irakasle eta ikertzaileak izanez gero, txartel korporatiboaren bidez) eta interneterako sarbidea daukan ordenagailu bat eskura izatea soilik eskatzen du.
Tokiko arduradunen hitzetan, "ospe handiko adituek ikuskatu dute sistema eta segurtasun berme guztiak ditu". Beste abantailetako batzuen artean aipa daiteke zenbaketa errazten duela eta barruti bakoitzean hautesmahai bat osatzea ekiditen duela. Oraingoan hautesmahai elektroniko bakar bat osatuta dago. Boto elektronikoko sistema honekin, EHUk "beste urrats bat" eman du administrazio elektronikoa ezartzeko bidean, "bizkortasuna, eraginkortasuna eta epe laburragoak" lortzeko asmoz.
Boto elektronikoa erabiliko dute lehendabiziko aldiz EHUko Klaustroa aukeratzeko
Euskal Herriko Unibertsitateak (EHU) azaroaren 22an egingo ditu Klaustrorako hauteskundeak eta, berrikuntza bezala, boto elektronikoaren sistema erabiliko da lehenengo aldiz lau ikastegitan: Letren Fakultatea, Psikologia Fakultatea, Medikuntza eta Odontologia Fakultatea eta Bilboko Ingeniaritza Goi Eskola Teknikoan, zehazki. Klaustroa, unibertsitateko kideen ordezkaritzarako organo gorena, otsailaren 15ean onartutako EHUren estatutu berrien arabera aukeratuko da lehendabiziko aldiz, tokiko iturriek zehaztu dutenez. Orain arte, errektore, idazkari nagusi eta gerentea barne, 300 klaustrokidek osatzen bazuten aipatu organoa, orain karguagatiko hiru kide eta beste 240 egongo dira. Azken 240 horiek modu honetan banatuko dira: 135 irakasle doktore iraunkor; 18 irakasle ez-doktore iraunkor ; gainerako bost irakasle eta ikertzaile; 53 ikasle eta 29 administrazio eta zerbitzuetako langile. Ikasleen ordezkariak bi urterako aukeratzen dira, gainontzekoak lau urterako. Bozkatzeko epea gaur, azaroak 15, gauerdian ireki da eta hilaren 22ko 17:00etan bukatuko da. Argazkian, hainbat fakultate Leioa eta Erandioko campusean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun