Esan bezala, ohi denez, ospe handiko egileak helduko dira Areetara. Horiek guztiak hitzaldietan eta aurkezpenetan arituko dira, hain arrakastatsuak diren sinatze-txandekin batera. Horrela, zaleek autorerik gustukoenak zuzen-zuzenean ezagutzeko aukera izango dute. Bestalde, azokak komikiaren munduko profesionalei urtero eskaintzen dien omenaldi tradizionaleko protagonistak hauek izango dira: Josep Maria Berenguer beteranoa, La Cupula argitaletxe enblematikoko editorea; eta Bilboko Astiberri argitaletxea, soilik hamar urteko ibilbidean arrakastaz betetako bidea egin duena, kalitatezko komikiak argitaratzeagatik.
Erakusketak
Halaber, erakusketak ez dira faltako aurtengo Getxoko Komiki eta Manga Azokan. Hamargarren ekitaldian, zenbait egileren lanen inguruko mostrak egingo dituzte. Horrela, publikoak ondorengo erakusketa monografikoa bisitatu ahal izango du: "Jazz Bulles Blues: komikia swing erritmoan”. Kasu horretan, binetaren, jazzaren eta blues-aren artean dagoen harremana ikus ahal izango da, Belgikako autore ospetsuen lanean. Han kokatuko dira, baita ere, La Cupula eta Astiberri argitaletxeei eskainitako mostrak; eta, azkenik, Portugaleteko Komiki Lehiaketaren 25. edizioaren erakusketa.
Bestalde, karparen kanpoaldean, “El Balanzin” aldizkariaren erakusketa ikusgai egongo da, Euskal Irudigileen Elkarte Profesionalaren argitalpenarena, alegia. Gainera, azken urteetan ohikoa den moduan, udal erakusketa-aretoetan eta Getxoko hainbat lokaletan, komikiarekin lotutako hainbat mostra izango dira, eta tartean Euskal Irudigileen Elkarte Profesionaleko artista ezberdinen lanak. Horiez gain, Victor Santos sortzaileari eskainitako erakusketa Bizkaiko Zubian egongo da.
Hitzaldiak, mahai-inguruak eta proiekzioak
Horri guztiari argitaletxeek eta egileek berrikuntzen inguruan egingo dituzten aurkezpenak gehitu behar zaizkio. Eta ez dira ahaztu behar areto nagusian egunero izango diren hitzaldiak eta mahai-inguruak edota emanaldiak, horietako asko ziklo interesgarrietan bilduak. Multimedia, animazioa, film laburrak, dokumentalak edo animeak... publikoak komikiaren munduarekin lotutako aniztasun zinematografikoaz gozatzeko aukera izango du. Manga komikiaren zaleek, berriz, haiei zuzendutako jarduera ezberdinak izango dituzte igandean, azaroaren 27an, horri eskainitako egunean.
Azaroaren 25etik 27era Getxoko hamargarren Komiki eta Manga Azoka izango da. Hiru egunetan zehar biñetaren munduko topagune bilakatuko da Areetako Xake plaza. Bertan, erosteko aukeraz gain, hainbat ekitaldi egongo dira. Batetik, 80 salmenta postu baino gehiago jarriko dituzte, non komiki-dendak, liburu-denda espezializatuak, aldizkariak, fanzineak, argitaletxeak eta "bederatzigarren arteari" loturiko hainbat sektore izango diren. Bestetik, aurtengo azokan Max edo Paco Roca autoreak egongo dira, biak ala biak Espainiako Komiki Sariaren irabazleak. Aurtengo saritua ere izango da Areetan: Santiago Valenzuela, alegia. Egile donostiarra pasa den astean jaso zuen saria eta, hori horrela, sari ospetsu horren hiru irabazle bilduko dira lehenengo aldiz Getxoko Komiki Azokan. Horiekin batera, Luis Royo fantasia-ilustratzailea, David Rubin, Mireia Perez, Nancy Peña, Manuel Bartual, Luis Bustos, Albert Monteys, Manel Fontdevila, Victor Santos eta beste asko izango dira. Argazkian, iazko Komiki Azokara hurbildutako hainbat lagun, artxiboko irudian / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun