"Gartxot" animazio film euskalduna bihar estreinatuko da Uribe Kostan

Erabiltzailearen aurpegia Ukberri 2011ko azaroaren 17a

Asier Altunak zuzendutako "Bertsolari" filmarekin gertatu ez bezala, euskarazko zinemaren azken ekoizpena, "Gartxot, Konkista aitzineko konkista", Uribe Kostan ikusi ahal izango da bihartik, ostiraletik, aurrera. Animaziozko filma Asisko Urmeneta eta Juanjo Elordik zuzendu dute eta girotzeko Benito Lertxundiren abestiez baliatu dira. Lana bihar estreinatuko da Algortako Kirol Portuko Lauren Getxo Zinemetako 6. aretoan. Bi saio izango ditu, arratsaldeko 4etan eta 6etan. Txartelak 7 eurotan saltzen dira. Saio bietan, euskaraz emango dute, espainolezko azpitituluekin. Euskara hutsez ikusi nahiez gero, eskaintzarik hurbilena Bilboko Multi zinemetan izango da. Filmak XII. mendeko Gartxot mendi gidari eta bardoaren eta Mikelot bere semearen kondaira tragikoa kontatzen du. Irudian, Gartxot eta Mikelot / © Somuga.

Orreagako abatetxeko fraideek Mikeloten ahots ederrez jabetuta, askatasunaren truke semea abatetxean uzteko proposatu zioten Gartxoti, latinez kanta zezan. Gartxotek proposamena errefusatu eta semea askatu ondorengo tragedia izango dugu ikusgai. Elordik eta Urmenetak botere erlijioso eta politikoari aurre egiteko eta bere sendiaren eta hizkuntzaren defentsan aritzeko gauza den antiheroia ekarri digute.

Ez da hau izango Gartxoten historiaren aurreneko bertsioa. Arturo Kanpionek "El bardo de Itzaltzu" lana argitaratu zuen 1917an, ipuin gisa. Aurretik izandako kondairan oinarrituta idatzi zuen ikerlariak. Kanpionen testuaren gainean, Victor Ruiz Añibarrok antzezlanerako gidoia prestatu zuen eta 1954an, idazlearen nafarraren mendeurrenean, Saski Naski Buenos Aireseko taldea taularatzen saiatu zen. Hiru hamarkada beranduago, 1981ean, Benito Lertxundik "Altabizkar/Itzaltzuko bardoari" diskoa kaleratu zuen, hamahiru abestiekin, tartean "Itzaltzuko bardoa" kanta entzun zitekeela. 2003an, "Argia" astekariak atalka argitaratu zuen Asisko Urmeneta, Jokin Larrea eta Marko Armspachen "Gartxot" komikia, urte berean liburuki batean bilduta berriro kaleratu zena. Sei urteren ostean, 2009ko abenduan, "Gartxot" film laburra bukatu zuen Somuga ekoiztetxeak. Oraingo honetan, film luzea eta horrekin batera "Gartxot, Konkista aitzineko konkista" liburua ere kaleratu dute Urmenetak eta Edorta Barruetabeñak.

"Gartxot" filmaren aurrerakina (© Somuga)



Asisko Urmenetaren adierazpenak (© Somuga)

Asiskoren azalpenak from Somuga on Vimeo.



Ahotsen grabaketa (© Somuga)

Gartxot, ahotsen grabaketa from Somuga on Vimeo.



"Itzaltzuko bardoa" abestia (© Benito Lertxundi)



Filmaren inguruko hainbat zehaztasun

Kultura Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun