Espainiako Auzitegi Nazionaleko Penaleko Hirugarren Aretoak zortzi urteko espetxe zigor bana jarri die Arkaitz Goikoetxea gazte getxoztarrari eta Aitor Cotano algortarrari. Felix Alfonso Guevara magistratua buru izan duen epaile-taldearen aburuz, aipatu bi gazteek eta Iñigo Gutierrez algortarrak ETA erakunde armatuaren komando bat osatu zuten 2008an zehar. "Askatasun Haizea", "Txikitze" eta "Hegoa" izenak izan zituen komandorako 30 kiloko lehergailu osatzea leporatu diete Goikoetxeari eta beste pertsona bati, lehergailu hori 2008ko urtarrilaren 31ko eguerdian Ertzaintzak Getxoko estrata batean leherkariz betetako garagardo kupela da. Biek, Cotanorekin batera, gorde ei zuten lehergailua Abrako itsas-erret klubean erabiltzeko, epaileen ustez. Baina ezin izan zuten lehertu aurretik Ertzaintzak topatu zuelako. Magistratuek baztertu dituzte akusatuen tortura salaketak eta babestu dute guardia zibilek akusatuen ziegetan bideoak grabatu ez izana "auziperatuen intimitatea gordetzeko". Iñigo Gutierrezen kasuan, absolbitu dute bere buruaren aurkako deklarazioa seinalatzen duen froga bakarra izanik. Argazkian, urriko azken ostiraleko elkarretaratzean ere salatu zuten epaiketa Algortan / cc-by-sa Algortan Egin Dezagun.
Pasa den azaroaren 2an, Arkaitz Goikoetxea, Iñigo Gutierrez eta Aitor Cotanori 16 urteko espetxe zigorra jartzea eskatu zuen Blanca Rodriguez fiskalak. Hasiera batean, lehergaiak gordetzea leporatzen zieten hiru preso politiko getxoztarrei, 8 urteko kartzelaldia eskatuz. Hilaren 4ra arte Espainiako Auzitegi Nazionalean egin zitzaien epaiketan, ordea, Abrako Erret Itsas Klubaren kontrako atentatu saiakera egotzi zieten gazteei. Eusko Jaurlaritzaren Herrizaingo Sailaren arabera "ETAko kideen arteko material entrega" bat zen. Abrako Itsas Kluba urte bereko maiatzaren 19an zartatu zuen erakunde armatuak.
Bitartean, Goikoetxeak, Gutierrezek eta Cotanok beraien abokatuen galderei baino ez zieten erantzun, inkomunikazio aldian sinarazitako deklarazioak "Guardia Zibilaren esku pairatutako tratu txar eta torturen ondorioz" izan zirela esateko. Horixe bera salatu zuten dozenaka lagunek Algortako Telletxe plazan egindako kontzentrazioetan.
Cotano, Goikoetxea eta Gutierrezen epaiketako autoa
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.