Gorenak Aitor Cotano eta Iñigo Gutierrez Legutioko atentatuaz absolbitu ditu

Erabiltzailearen aurpegia Ukberri 2011ko aza. 18a, 16:22

Espainiako Auzitegi Gorenak Aitor Cotano eta Iñigo Gutierrez gazte algortarrak absolbitu ditu Legutioko Guardia Zibilaren kuartel-etxearen kontrako atentatuaz. Arkaitz Goikoetxearen kasuan, berriz, berretsi du iaz Espainiako Auzitegi Nazionalak jarritako 513 urte eta 6 hilabeteko espetxe zigorra. Gorenak pasa den urriaren 18an sinatu zuen epaia, nahiz eta atzo iluntzera arte ez zen zabaldu. Autoan, magistratuek onartzen dute Auzitegi Nazionaleko epaia "neurri handi batean" Poliziaren aurrean egindako deklarazioetan oinarritzen dela eta horiek "kargu-froga gisa baloratu ezin" direla, auziperatuek emandako datuak okerrak edota "ezezagunak ez zirenean", gainera. Hori dela eta, Gutierrez, zortzi urteko zigorra zuena, absolbitu dute. Gauza bera egin dute Cotanorekin, atentatu egunean Londresen zegoen arren 513 urte eta 6 hilabetera zigortutakoa. Bere kasuan, deklarazioez gain, ibilgailu batean topatu zituzten DNA arrastoak zeuden, baina autoa lagun batena izatea eta hainbatetan gidatu izanak argitzen du arrasto horien presentzia. Argazkian, auzokideak Cotano eta Goikoetxearen irudiak sostengatzen, aurreko batean.

Goikoetxearen DNA, ordea, atentatua egiteko furgonetan topatu zuten. Gainera, Pazuengos herriko zuloa miatzera eraman zutenean, epailearen aurrean atentatuaren eginkizuna onartu zuela dio Gorenak. Akusatuek torturak salatu zituzten.

Guardia zibil baten helegitea

2008ko maiatzaren 14an izandako atentatuan Juan Manuel Piñuel sarjentua hil eta 26 lagun zauritu ziren, guardia zibilen senideak tartean. Horiek guztiak biktimatzat jo zituzten. Halere, Gorenak Vanesa Fraga guardia zibila ere kaltetu gisa onartu du. Izan ere, atentatua gauzatu zenean kuartel-etxean egon ez arren, bere ondasunak leherrarazi zituen eztandak. Dena den, Fragak agertutako ondorio psikiatrikoak atentatuari leporatu ezin zaizkiola defendatu du Miguel Colmenero Menendez de Luarcak gidatutako epaile taldeak. Erabaki horrek eragin du autoari jarritako boto partikular bakarra. Manuel Marchena magistratuaren arabera, kalte psikiatrikoak ere onartu behar zitzaizkion guardia zibilari.

Auzitegi Gorenaren epaia

Politika Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun