Hurrengo egunean, hilak 26, Barrikan Mankomunitateak egingo duen elkarretaratzera deitu du Udalak. Eguerdian egingo dute bertako udaletxearen aurrean, Aintzane Garai Lopez indarkeria matxistaren biktima barrikoztarra gogoratzeko asmoz. Eguna Berango Antzokian amaituko dute, "Izarren argia" filmaren espainolezko bertsioa proiektatuz.
Bestalde, Berdintasunaren aldeko Zine-forumak "sexuen arteko parekidetasun eza errealitate agerikoa" dela irudikatuko du hainbat filmen bitartez. Horrela, hileko hirugarren ostegunetan, 18:30ean, pelikula bana jarriko dute, guztiak espainolez, sarrera doan izango dela. Abenduaren 15ean, "Solas"-en umore garratzeko emakume baten eta gozotuko duen bere amaren historia izango dugu ikusgai. Urtarrilaren 19an, "La linterna roja"-k hiru emazte dituen gizon batekin ezkontzera behartuta dagoen neska gazte txinatar baten erretratua emango digu. Otsailaren 16an, "La casa de los babys" proiektatuko dute. Bertan, sei emakumek Hego Amerikako hotel batean itxarongo dute batera adopzio-umeak eman diezazkien. Martxoan, "Libertarias" filma izango da ikusgai, Espainiako Gerra Zibilean barneratzen den filma. Apirileko pelikula "Agua" izango da, Erresuma Batuaren menpeko Indian neskatilak agureekin ezkontzeko ohitura ekarriko diguna. Zikloa maiatzaren 17an amaituko da, "Memorias de Antonia"-rekin, bere bizitza eta borroka feminista oroitzen duen atso baten historia.
Emakumeenganako indarkeriaren aurkako ekitaldiak bihar abiatuko dituzte Berangon
Bihar, larunbatarekin, azaroaren 25ean aldarrikatzen den Emakumeenganako Indarkeriaren Kontrako Nazioarteko Egunaren ekitaldiak abiatuko dituzte Berangon. Arratsaldeko 7etan, "Emakume bertsolariak" lelopean jardun beharko dute Uxue Alberdi, Iratxe Ibarra eta Onintza Enbeitak, Nahikari Ayok gidatuko duen bertso saioan. Ekitaldia Berangoko Udalak antolatu du eta Santa Ana auzoko Berango antzokian egingo da. Ekimenen hurrengo hitzordua azaroaren 25ean bertan izango da, indarkeriaren aurka Mankomunitateak antolatutako ibilaldia Berangoko metro geltoki paretik goizeko 12:10ean abiatuko dela. Aurretik, eguerdian, bortxakeria sexistaren aurkako elkarretaratzea egingo dute bertan, Udal Gobernuko ordezkariak presente izango dituen lehenengoa. Egun berean, 19:30ean, musika klasikoa jotzen duen Impromptu bikotea Berango Antzokian arituko da. Argazkian, 2009ko urtarrilaren 24an ezker abertzaleak deituta bortxaketa bat salatzeko Berangon egin zuten elkarretaratzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun