Hausle guztiek ez dute botoa sartuko hautestontzietan betiko moduan. Hauteskunde hauetan EHUk boto elektronikoa erabiliko du estreinakoz lau ikastegitan: Letren Fakultatean, Psikologia Fakultatean, Medikuntza eta Odontologia Fakultatean eta Bilboko Ingeniaritza Goi Eskola Teknikoan, ikasleek eta irakasle eta ikertzaile iraunkorrek boto elektronikoko sistema erabiliko dute. Sistema hori aitzindaria da EHUn, baita Euskal Autonomia Erkidegoan ere. Graduondoko ikasleek ere elektronikoki bozkatuko dute. Sistema elektroniko hori oso erraz eta intuitiboa da; soilik eskatzen du aldez aurretik boto-emailea identifikaturik egoteak (bai sinestamenduaren bidez —errolda elektroniko osoari banatu zaizkio sinestamendu pertsonalizatuak—, DNI elektronikoaren bidez, edo, irakasle eta ikertzaileak izanez gero, txartel korporatiboaren bidez) eta Interneterako sarbidea daukan ordenagailu bat eskura izateak. Bozkatzeko epea hilaren 15ean ireki zen eta bihar 17:00etan bukatuko da.
Klaustro berria
Klaustro berriaren behin-behineko aldarrikapena hilaren 23an izango da eta behin betikoa hilaren 28an. Aipatu organoa abenduaren 15ean bilduko da eta irekitze-bilera horretan EHUren lehen Aldezlea aukeratuko du. Unibertsitarioen defendatzailearen erakunde horrek irakasleen, ikasleen eta administrazio eta zerbitzuetako pertsonalaren eskubideen eta askatasunekiko errespetuaren bermatzea du eginkizun, unibertsitateko organo eta zerbitzu ezberdinen ekintza eta jardunetan. Azaroaren 17an Gobernu Kontseiluaren azken bilerak erabaki zuen Itziar Etxebarria Bilbao Psikologia Fakultateko irakaslea Aldezle izateko Klaustroari proposatzea. Bestalde, datorren urteko lehen hiruhilabetekoan Klaustroak Gobernu Kontseilu berria aukeratu behar izango du.
Euskal Herriko Unibertsitateak bihar, asteartea, Klaustrorako hauteskundeak egingo ditu. Unibertsitateko 51.510 kidek botoa eman ahal izango dute eta aukeratuko den Klaustroa otsailaren 24tik indarrean dauden Estatutu berrien araberako lehena izango da, EHUko iturriek zehaztu dutenez. Hautesleek goizeko 9etatik 18:00etara bozkatu ahal izan dute dagokien hautes-mahaian —65tik gora mahai egongo dira—. Administrazio eta zerbitzuetako langileek, irakasle iraunkor ez-doktoreek eta gainerako irakasleek campusetan emango dute botoa; irakasle iraunkor doktoreek eta ikasleek, berriz, beraien ikastegietan. Guztira, 150 hautagai zerrenda aurkeztu dira, bakoitza sektore eta barruti zehatz bati dagokiolarik. Ikastegi batzuetan epea amaitu zaien Ikastegiko Batzarreko ordezkariak ere aukeratuko dira. Argazkian, hainbat fakultate Leioa eta Erandioko campusean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun