Hurrengo bi asteazkenetarako, azaroak 23 eta 30, bi ordutako lanuzteak deituak dituzte Metro Bilbao garraio enpresako beharginek. Geldialdiak 5:45etik 7:45era izango dira. Sindikatuetako ordezkariek atzo goizeko elkarretaratzean azaldu zutenez, "ez gabiltza diru eske. Ez dugu euro bakarra eskatzen, Metro Bilbaoren zuzendaritzak negoziazio kolektiboan jasotako akordioak bete ditzan borrokatzen ari gara, besterik ez". Hain zuzen ere, uztailaren 11n hitzartutakoa "betetzeko asmorik ez" izatea leporatzen diete garraio enpresako arduradunei: "azaroaren 11rako 12 kontratazio berri egingo zituztela hitzeman ziguten, geltokietarako 182 langile eta 166 gidari izateko", zehaztu dutenez. Bitartean, gutxieneko zerbitzuak ezarri ditu biharko Metro Bilbaok; zirkulazioen %30, alegia. Argazkian, metroko langileen atzoko protesta / © LAB Metro Bilbao.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun