Leioako Udondo gaztetxearen 11. urteurreneko ekitaldiekin bat eginez, asteazken honetan, hilak 23, “Intsumisioa. 20 urte desobeditzen” izenburuko dokumentala aurkeztuko dute aipatu zentro sozial autogestionatuan. KEM Kontzientzia Eragozpen Mugimenduak egindako ikus-entzunezko lanak "Estatu espainiarreko azken garaietako antimilitarismoaren eta kontzientzia-eragozpenaren historia erakusten du", sortzaileek beraiek azaldu dutenez. "Francoren diktaduraren azken urteetatik gaur arteko epea azaltzen da. Intsumisioaren kanpaina du ardatz; izan ere, milaka gaztek egin zioten uko ejertzitoari gizarte desmilitarizatu bat eraikitzeko helburuarekin, baita kartzela-zigorrak beren gain hartuz ere", zehaztu dutenez. KEM kolektibo antimilitaristak antolatuta, 19:30etik aurrera izango da biharko saioa Udondo gaztetxean. Argazkian, gaur egun armaden zein armagintzaren kontrako borrokan jarraitzen du KEMek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun