Emakumeenganako Indarkeriaren Kontrako Nazioarteko Eguna dela eta, ostiral honetarako, azaroak 25, elkarretaratzea deitu du Leioako Bilgune Feministak. Hitzordua 19:00etan jarri dute Bulebarrean. Eragile leioztarrak kritikatu duenez, "horrelako egunak adierazpenak eta hitz politak esateko erabiltzen dituzte instituzio gehienek. Hala ere, emakumeak subjektu pasiboak bagina tratatzen gaituzte instituzioetatik, gure burua defendatzeko gaitasunik ez bagenu bezala, zer nahi dugun jakingo ez bagenu bezala". Hori dela eta, "neurri zehatzak eta eraginkorrak" abiatzeko deia luzatu diete erakunde publikoei. Emakumeei, berriz, eskuak gurutzaturik ez geratzeko eskatu diete: "Egoeraz kontziente izan gaitezen emakumeok eta guztion arazo egin dezagun bizi duguna! Denon artean aurre egin diezaiogun indarkeria sexistari!".
Leioako Bilgune Feministaren ustez, "ezin ahaztu daiteke salatzeaz gain, neurri zehatzak eta eraginkorrak abiatu behar direla. Erakundeek orain arte bultzatu lege, protokolo eta neurriek, ez dute ahalbidetu belaunaldi berriek indarkeriari buruzko heziketa hezkidetzailea izatea, prebentzio mailan duen garrantziarekin. Erakundeek plan integralak abiatu beharko lituzkete, prebentzioan, sentsibilizazioan eta ondorengo neurrietan kokatuak".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun