Enpresa batzordeak salatu du Zuzendaritzak, "bere interes partikularren kontra doan edozein arau edo akordio sistematikoki urratzeaz gain, auzia eta liskarra bilatzen dituela" langileen ordezkariekin egiten duen bileretan. "Adibidez, Eusko Jaurlaritzak xedatzen dituen gutxieneko zerbitzuak diseinatzen dituenean, langileen %50 inguru deitzen ditu gutxieneko zerbitzuak egiteko, %30 baino bermatu behar ez baditu ere. Horrez gain, Zuzendaritzaren iritziz, pertsona batek gutxieneko zerbitzuak eta lanuzteak egin ditzake aldi berean, eta gutxienekoak baino tren gehiago ateratzeko proposatzen die gidariei, bestela lanuztea egin dutela ulertuko duelako", azaldu dute ELA, CIM, UGT, LAB eta ESK sindikatuek.
Kritikatu dutenez, "Zuzendaritzak saldu nahi du gutxiengoa dela protestan dabilena eta, aldi berean, hondatu nahi du enpresa batzordearen borondate sendoa, lan-hitzarmena eta sinatutako akordioak bete ditzan". Langileen ordezkarien ustez, "guztiz alderantzizkoa" lortzen ari dira garraio enpresako arduradunek: "lanuzteen eta mobilizazioen jarraipen handia". Horren adibidetzat jarri dute duela sei hilabete, akordio bat sinatzeko 9 lanuzte-egun behar izan zituztela. Hain zuzen ere, uztailaren 11n hitzartutakoa "betetzeko asmorik ez" izatea leporatzen diete Metro Bilbaoko zuzendariei; "lantaldeak gehitzeari buruzko akordioak, mantentze-arloa berregituratzea, gidatze-txandak, eta abar".
Abendurako lau lanuzte-egun aurreikusten dituzte Metro Bilbaoko langileek, tartean Santo Tomasetan
Gaurko, 5:45etik 7:45era bitartean deituta zegoen lanuzteak "oso jarraipen handia" izan du, Metro Bilbaoko enpresa batzordeak adierazi duenez. ELA, CIM, UGT, LAB eta ESK sindikatuek emandako datuen arabera, garraio konpainiako "langileen %80k" bat egin du geldialdiarekin; horiek artean "gidarien ia %100k, gutxieneko zerbitzuak kenduta". Metro Bilbaoko zuzendaritzarentzat, ordea, bestelakoa izan da egoera. Enpresako arduradunen arabera, "76 beharginek egin dute bat deialdiarekin, %10,27k, alegia. Edozein lanegunetan tarte horretan eskaintzen den zerbitzuaren %52 eman da". Bitartean, datorren astean langileak beste batzar batera deituko dituela jakinarazi du enpresa batzordeak. Abenduan hainbat elkarretaratze eta beste lau lanuzte-egun aurreikusten dituzte, tartean Santo Tomas egunean. Gogoratu hilaren 30ean ere izango dela geldialdia, goizeko 5:45etik 7:45era. Horrekin batera, barkamenak eskatu dizkiete metroko erabiltzaileei. Berain gogo txarra "egoeraren benetako errudunei" helaraztea eskatu diete info[abildua]metrobilbao.net helbide elektronikoa baliatuz, Jose Ignacio Prego kontseilari ordezkariari zuzenduta. Argazkian, metroko langileen asteleheneko protesta / © LAB Metro Bilbao.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun