"Sexu jazarpenari stop, langile ekin alternatibari!" lelopean, ostiral honetan, azaroak 25, eskualde guztietan egingo ditu mobilizazioak LAB sindikatuak. Uribe Kosta eta Erandiori dagokionez, Astrabuduko Josu Murueta plazan jarri du hitzordua eguerdiko 12:30ean langile erakunde abertzaleak. Aurretik, goizeko 10etan, "Sexu jazarpena lan munduan" izenburuko hitzaldia izango dute delegatuek. Halaber, Leioan eta Itzubaltzeta / Romon arratsaldez egingo diren bateratzeetan parte hartzera deitu ditu militanteak Eskumaldeko LABek. Hurrenez hurren, Santa Eugenian eta Bulebarrean izango dira mobilizazioak 19:00etan. Aurretik perkusio afrikarra egongo da entzungai 18:30ean Itzubaltzetan. Hego Euskal herriko lau hiriburuetan ere, Eusko Jaurlaritzako ordezkaritzen eta lan ikuskaritzaren aurrean kontzentrazioak egingo ditu LABek, gutun bitartez interpelazioa eginez "behingoz benetako neurriak har ditzaten exijituz".
Lan munduan sexu jazarpenari aurre egiteko eta prebentzioa lantzeko protokoloa ezagutaraztera eman zuen orain hiru urte LAB sindikatuak. Denbora horretan trebakuntza landu du bere delegatuekin eta hainbat lantokitan horiek negoziatzeko eskaerak abiarazi dituzte. "Azarora bitartean indarrak honetan zentratu ditugu eta Euskal Herriko ehun lantoki baino gehiagotan protokoloak negoziatzeko eskaerak egin ditugu. Azken batean, argi daukagu sexu jazarpenari aurre egiteko, lantokietan egiten dugun lana lehenetsi beharra daukagula. Alde batetik borroka ideologikoan sakontzen jarraitzeko, eta bestetik, LABetik egiten dugun ekintza sindikala, sexu jazarpenarekin amaitzeko eta emakumeon zapalkuntzari aurre egiteko bideratua egotea nahitaezkoa deritzogulako", adierazi dute lan-erakunde abertzaleko iturriek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun