Bihar eguerdian egingo dute elkarretaratze bana Leioa eta Erandioko emakumeen elkarteek
Azaroren 25eko Emakumeenganako Indarkeriaren Aurkako Nazioarteko Egunean, ohi bezala, eguerdiko 12etan egingo du elkarretaratzea Irailaren 23a plazan (udaletxe aurrean) Erandioko Emakumeen Elkarte Sozio-Kulturalak (EEESK). Arratsaldean, berriz, 18:00etan izango dira proiekzioak metro geltokiko zabalgunean. Azkenik, Santa Zezilia eguneko ospakizunekin bat eginez, Altzagako azoka zaharrean izango den kontzertura deitu dituzte emakumeak. 20:00etatik aurrera, Mocedades taldeari egingo diote omenaldia Altzaga abesbatzak, Mendibaiartek eta Erandioko Udal Musika Bandak. Leioan ere 12:00etan izango da kontzentrazioa Bulebarrean, Andrak elkartearen eta Udal Berdintasun Arloaren ekimenez. 21:00etan, berriz, munduko musika egongo da entzungai Kultur Leioako auditorioan. Argazkian, azaroaren 25eko elkarretaratzea Erandion, artxiboko irudian.
Bestalde, Emakumeenganako Indarkeriaren Kontrako Nazioarteko Eguna dela eta, Leioako Udalak biolentzia mota oraindik ezezagun bat identifikatzearen alde egingo du: seme-alabek euren amengan eragiten duten biolentzia, hain zuzen ere. Hori dela eta, Sentsibilizazio Puntua ezarriko dute Bulebarrean bihartik abenduaren 2ra bitartean (11:00etatik 13:00etara eta 17:00etatik 20:00etara arte) seme-alabek eragindako biolentzia mota hori zelakoa den jakitera emateko asmoz. Karpak hainbat atal izango ditu: hasieran arazoaren aurkezpen bat egiten da datuekin, hainbat ezaugarri azpimarratuz, tokiko iturriek adierazi dutenez. Bigarren atalean, biolentzia mota horretako adibide errealak ikusteko irudiak izango dira ikusgai. Bertan hainbat gazte ikusten dira euren amak iraintzen. Azkenik, hirugarren zonaldean leioaztar bakoitzak irudiak ikusterakoan sentitu izan duena azaldu ahal izango du mezu baten bidez. Horretaz gain, arazo horren aurrean zer egin badagoela argi utzi nahi du Udalak, eta batez ere, laguntza emateko, Gizarte Zerbitzuak daudela jakinarazi nahi du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun