Algortako familia bat kaleratzeko asmoz, gaur burutu behar zuten Neguriko epaitegian bere etxeko enkantea. 2008ko uholdeek eragindako kalteak konpontzeko eskatutako 200.000 euro baino gehiagoko maileguaren kuotak ordaintzeari utzi behar izan zion Marta Uriarte Zubiletako bizilagunak, bera langabezian geratu zelako eta senarraren enpresak porrot egin zuelako. 2011ko apirilean hipoteka kobratzeko pausuak abiarazi zituen BBK-k. Gaurkoan, ordea, "forma akatsa" izan dela ondorioztatuta enkantea bertan behera utzi du epaileak. Hipotekek Kaltetutakoen EAEko Plataformaren (HKP) ordezkaria ere denaren abokatuak, Miren Mentxakak, azaldu duenez, joan den astean aurkeztu zuten idatzia, "etxebizitzaren metro koadro kopuruan errakuntza" zegoela argudiatuz. Halaber, bere bezeroaren "babesgabetasuna" izan zuen aipagai, "aurreko letraduak Marta defendatu nahi izan ez zuelako". Orain, hilabeteko epea izango dute BBKrekin irtenbideren bat negoziatzeko. Argazkian, Marta Uriarte kaltetua eta Miren Mentxaka abokatua, biak ala biak Hipotekek Kaltetutakoen EAEko Plataformako kideak.
Finantza erakundearekin akordiori lortu ezean, aurrera jarraituko du prozedura judizialak. Mentxaka "itxaropentsu" azaldu da. Bitartean, Uriartek, "egoera honetan atzera pausu bat bera ere eman nahi ez izatea" leporatu dio BBKri. "Epaitegiak helegitea atzera botaz gero, kale gorrian geundeke", tamaldu duenez. EAEko HKPko ordezkariak azaldu duenez, "uneoro zorrotza eta erabatekoa izan da BBKren jarrera, hipoteka negoziatzen hasteko gutxienez 20.000 euro edo ondareak eskatuz. Guztiz ezinezkoa, kontuan hartzen badugu enkantean jarri nahi zutena bizi garen etxebizitza dela eta besterik ez daukagula".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun