Euskal preso eta iheslari politikoen etxeratzea musika doinuez aldarrikatu dute Algortan

Erabiltzailearen aurpegia Ukberri 2011ko aza. 25a, 23:13

Egin Dezagun Bidea ekimenarekin bat eginez, 280 gizon-emakume inguru elkartu dira gaur iluntzean Algortan, euskal preso eta iheslari politikoen eskubideak aldarrikatzeko asmoz. Herriko musikariek egin dute oraingo honetan hileko azken ostiraleko kontzentraziorako deialdia: Oihartzunak (Oihukatuak kolektiboa) eta Gibelurdiñek taldeek kantez bete dute Telletxe plaza, zuzeneko emanaldia eskainiz. Hain zuzen ere, horiek San Nikolas ikastolako langileen eskutik jaso dute "elkartasunaren kinkea". Urriko azken ostiralean beraien lankide preso Imanol Beristainen egoera salatu zuten irakasle, aita-ama eta ikasleek. "Bere jarduera politikoarengatik atxilotua eta, epaiketarik gabe, espetxean jarraitzen du mutilak", gaurko kontzentrazioan Algortako Herri Bilguneak salatu duenez. Halaber, Arkaitz Goikoetxea, Aitor Cotano eta Iñigo Gutierrez gatibu algortarrei ezarritako sententziak zein Iker Beristaini egindako epaiketaren berri eman dute. "Konponbide garai berri honetan, horiek guztiek lekuz kanpo daude", salatu dutenez. Bestalde, Txus Martin preso basauritarraren egoera "gero eta larriagoa" dela ohartarazi dute. Hartara, bihar, Basauriko Arizgoiti plazan 17:30ean izango den ekitaldira bertaratzera deitu dituzte algortar guztiak. Argazkian, Gibelurdiñek gaurko elkarretaratzean / cc-pd Algortan Egin Dezagun.

Txus Martin preso basauritarra hizpide, Angel Figueroa algortarraren egoera ekarri dute gogora gaurko elkarretaratzean. "2008ko azaroaren 12an atera zuten espetxetik. Hala ere, kalean baina oraindik ere preso daukate", salatu dutenez. Gaixotasun larria du Algortakoak eta kontrol neurri oso zorrotzak ezarri dizkiote. Etxean lo egin behar du eta etxea aldatuz gero espetxearen baimena behar du. Medikuarengana joateko baimena eskatu behar dio kartzelari, eta ezin du Getxoko udalerritik irten medikura joateko, baldin eta nahikoa arrazoi ez badago. Toki zehatz batzuetara joatea ere debekatuta dauka Figueroak.

Algortako Herri Bilguneak zabaldutako prentsa oharra



Azaroko azken ostirala Algortan (cc-pd Algortan Egin Dezagun)

Politika Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun