Inaugurazio ekitaldian, Iñaki Goirizelaia EHUko errektoreak, eraikin berriak "Euskal Herriko Unibertsitatearen osotasunaren barnean duen garrantzia" azpimarratu du: “Irakasleen Eskola atal erabakigarria da gure egitura akademikoan”, adierazi duenez. Eta erakundeei, batez ere Bizkaiko Foru Aldundiari eta Eusko Jaurlaritzari eskerrak eman dizkie, "azpiegitura berri honen proiektuan izan duten parte hartze garrantzitsuagatik". Gurutze Ezkurdia Bilboko Irakasleen Unibertsitate Eskolako zuzendariak bere aldetik, "azpiegitura berri honekin Bizkaiko hezkuntza arloko ikasketak behar zuten tokian" kokatuko direla aipatu du: "hau da, puntako irakaskuntza puntako instalazio batzuetan ematea ahalbidetuko duen XXI. mendeko eraikin batean", gaineratu duenez.
Aldundiarekin lankidetzan
Azkenik, Jose Luis Bilbao ahaldun nagusiak berretsi egin du Bizkaiko Foru Aldundiak EHU-rekin duen konpromisoa. Horren adierazgarri, aurreratu du datorren urtean foru erakundeak 28 milioi euro baino gehiago bideratuko dituela EHUrekin lotutako proiektuetara. Horien artean, ahaldun nagusiak Industria Ingeniaritza Teknikoko Eskola eta Meatzeen eta Herri Lanen Ingeniaritza Teknikoko Eskolaren sorrera aipatu ditu. Horietara, 13,5 milioi euro bideratuko dira datorren urtean. Partida ekonomiko hori eraikinaren finantzazioa osatzeko erabiliko da. Horixe adostu zen EHUrekin egindako akordioan, Leioa eta Erandioko campusean Irakasleen Unibertsitate Eskola eraikitzearekin batera. Halaber, foru ekarpenarekin honako hauek ere finantzatuko dira, besteak beste: hainbat master, Plentziako Itsas-Estazioa edo campusaren sarrerako errepideko lanak. Bilbaoren hitzetan, "Bizkaiko Foru Aldundia ahalegin handia egiten ari da, are handiagoa krisi garai honetan, EHUrekin lankidetzan aritzeko. Izan ere, ziur gaude unibertsitate hobeak etorkizun hobea dakarrela. Eta horixe da Bizkaiko Foru Aldundiak eraiki nahi duena: etorkizun hobea eta oparoagoa bizkaitar guztientzat".
Gaur inauguratu dute Irakasleen Unibertsitate Eskola berria Leioako campusean
Ateak irailaren 12an zabaldu zituen arren, gaur inauguratu dute Irakasleen Unibertsitate Eskolaren eraikin berria, Leioa eta Erandioko campusean. Instalazioek 1962tik horren egoitza izan den Bilboko Arangoiti auzoko eraikin zaharra ordezkatuko dute. Horrela, 2011-2012 ikasturte honetarako Irakasleen Unibertsitate Eskolan matrikulatu diren 2.072 ikasleak "eraikin moderno eta eroso honetan" osatzen ari dira jada beraien ikasketak, EHUko arduradunek aipatu dutenez. Orain gutxi eratutako ikasle asanblada berria, ordea, ez dago guzti horrekin ados. Besteak beste, bideo-zaintza, garraio eta baliabide eskasak, adierazpen eta ibiltzeko askatasun eta informazioa jasotzeko eskubide murritzak salatu dituzte campus osoan banatutako esku-orrietan. Era berean, manifestazio zaratatsua burutu zuten ostiralean 67 ikasle bilduz. Argazkian, EHUko zein gainontzeko erakunde publikoen ordezkariak gaurko ekitaldian / © Bizkaiko Foru Aldundia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun