Ostegun honetan, abenduak 1, Boluntariotza Erakundeen Getxoko XVIII. Topaketa izango da. Oraingoan elkartasunerako bide berriak aztertuko dituzte, 17:45etik 20:30era Itzubaltzeta / Romoko Gobelaurre Boluntariotza Zentroan izango den ekitaldian, udal iturriek zabaldu dutenez. FEGEVOLek, Getxoko Boluntariotza Erakundeen Federazioak, Udalarekin elkarlanean antolatutako ekimenaren helburua da "boluntarioak gizartearekiko egiten duen lan eskergaren berri getxoztarrei ematea, eta hainbestez, elkarteren bateko kide izateko eskatzea ere", azpimarratu dutenez. Oraingoan boluntariotza elkarteek beren taldeetan krisi egoera posiblea eragiten ari diren ustezko arrazoiak aztertuko dituzte, tartean gizartean elkartasunaren alorreko baloreen galera eta beharrizan berrien eskariak ez duela taldeetan erantzunik aurkitzen, elkarteen beraien konpromisorik ezagatik edo baliabiderik ezagatik. Argazkian, iaz Susan Josendek, Margarita Tarazagak eta Berdintasuna elkarteak jaso zituzten Getxoko boluntarioen sariak / © Getxoko Udala.
Topaketen inaugurazioa 18:00etan izango da Imanol Landa alkatearen eta Juan Jose Quiñones FEGEVOLeko presidentearen eskutik. Ordu laurden geroago Juan Pagola boluntariotzaren prestakuntza arloan aditua den kazetaria eta Deustuko Unibertsitateko Donostiako campuseko irakasleak “Elkartasunerako bide berriak” gaiaz hitz egingo du; eta 19:15ean, aukeratutako 2011ko boluntarioari eta erakundeari ohiko sari bana emango diete. Ekimenari Ohiulari Klown taldeak ipiniko dio amaiera, “Clownklusioak” aurkeztuz. Mokadua ere izango da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun