Amaitu da jada Leioako Basaez auzoko obren lehen fasea, udal iturriek zabaldu dutenez. Horrekin, Artatza, Joaquin Achucarro eta San Bartolome kaleak urbanizatu dira. Orain, zonaldean eraikiko diren 190 etxebizitzak jarriko dira martxan. Horietatik abian dira jada babes ofizialeko 30 etxeak. Eneko Arruebarrena alkateak prentsaurrekoan aitortu zuenez, "atzerapen txikia izan dute obra hauek, baina behingoz amaituta dago zonaldeko obren lehen fasea, alegia, San Bartolome kale osoaren urbanizazioa, Achucarro kaleko azken zatia eta Artatza kaleko zati bat. Horretaz gain, Altzagaondo parkea egokitu da, zonaldeko gune berdeak amaitutzat emanez". Kaleko egokitzapenarekin batera, auzoan 190 etxebizitza altxatuko dira, hauetatik martxan diren babes ofizialeko 30ak. Oraindik bigarren fasearen obrak geratzen dira egiteko, hau da, kultur gunea eta baselizaren inguruko zonaldea. Proiektu horrek aurreikusten duen bezala, San Bartolome plazaren azalera bikoiztu eta berritu egingo da, herri kirolen korridorea berrituko da eta parkea egokituko da. Urbanizazio lan horien aurrekontu osoa 5 miloi eurokoa da, horietatik Udalak bi miloi baino gehiago jarriko ditu. Gainontzekoa sustatzaile pribatuek jarriko dute. Argazkia: © Leioako Udala.
Guzti horretaz gain, eta Elizaren kontura, Basaez auzoak baseliza berri bat ere izango du laster, orain arte zabalik zegoena ordezkatuko duena. Apezpikutza eliza berri honen esleipen prozesua amaitzen ari da, ahalik eta arinen eraikuntza obrekin hasteko. Ideien lehiaketa bat antolatu zuten proiekturik onena aukeratzeko. "Beraz, eraikin hau berezia eta arkitektura aldetik balio handikoa izango da", Arruebarrenaren arabera. Auzoan ziren Oblatuak alde egin eta gero, Basaezko baseliza kokatzen den lurzorua higiezinen sustatzaile baten esku geratu zen. Gauzak horrela, Udalak eta Apezpikutzak akordio batera heldu ziren tenplu berri bat eraikitzeko auzoan bertan. Modu horretan, udal erakundeak tenplurako lurzoru berriaren erabilera luzatu zuen 50 urteko administrazio kontzesio baten bidez; eta Elizak, tenplu berria eraikitzeko arduradun egin zen 700.000 euroko inbertsioarekin. Eliza berri horrek azken urteetan auzoan zegoena ordezkatuko du, eta berria prest dagoenean zaharra botako dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun