Urtero legez, udazkenarekin batera, ibilaldi neurtua antolatu du Berangoko Sei Herri kultur elkarteak. Igande honetan, abenduak 4, izango da Uribe Kosta zeharkatzen duen martxa. Orain dela 29 urte, herriko gazte talde bat ibilaldia antolatzen hasi zen eta gaur egunera arte mantendu da jende askoren laguntza eta inplikazioaz. "Aurtengo egoera ekonomikoa dela eta, batez ere herriko komertzio eta lantegien esfortzua eskertu nahiko genuke, beraien laguntzarik gabe ezinezkoa izango bailitzateke egun hau aurrera ateratzea", nabarmendu dute antolatzaileek. Bi ibilbide izaten dira: bata, 8 kilometrotakoa gutxi gora behera, txikientzat; eta bestea, 14 kilometro ingurukoa, helduentzat, bikoteka egin behar dena. Azken horiek 8:15ean eman beharko dute izena Sei Herri tabernan, 9:00etan ateratzeko. Txikiek, berriz, 9:00etan daukate apuntatzeko ordua eta 9:30ean ateratzekoa. Irteera eta helmuga Sei Herri tabernan izango dira, Sabino Arana kalean. Argazkian, dozenaka lagun batzen dira ibilaldiaren osteko bazkarian.
Ibilaldia bukatuta, eguerdi aldera, musikaz alaitutako poteoa egingo dute herriko tabernetatik. Ondoren, bazkaria izango dute guztiek, Berangoko frontoian: txikiek 14:00etan dohainik, eta nagusiek 15:00etan 5 euro ordainduta. Sari banaketari dagokionez, 18:30ean izango da. Oroigarri bezala, ibilaldian parte hartzen duten guztiek etxera eraman ahal izango dute horren bereizgarria bihurtu den banderatxoa, Algortako Javi Martinezek urtero diseinatzen duena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun