Klaustroko 236 kide berriak abenduaren 15ean bilduko dira lehendabiziko aldiz
Azaroaren 22an izandako Euskal Herriko Unibertsitateko Klaustrorako hauteskundeen behin betiko emaitzak atzo ezagutzera eman ziren. Unibertsitateko kideen ordezkaritzarako organo gorena osatuko dute karguagatiko hiru kidek, hau da, errektoreak, idazkari nagusiak eta gerenteak, eta hautatutako 236 kidek. Soilik lau toki geratu dira hutsik. Klaustro berria otsailaren 24tik indarrean dauden Estatutu berrien araberako lehena da eta abenduaren 15ean izango du lehendabiziko batzarra. Hauteskundeetako parte hartzeari dagokionez, irakasle iraunkor doktoreen %67,40k botoa eman zuen (erroldako 2.123 pertsonetatik 1.431k botoa eman zuten); irakasle iraunkor ez-doktoreen %51,13 (530etatik 271k); gainerako irakasle eta ikertzaileen %17,15ek (2.548etatik 437k); ikasleen %12,32k (44.590etatik 5.492k) eta administrazio eta zerbitzuetako langileen %56,11k (1.873etatik 1.051k). Argazkian, hainbat fakultate Leioa eta Erandioko campusean.
Abenduaren 15eko batzarrean EHUren lehenengo Aldezlea aukeratzea espero da, unibertsitateko iturriek adierazi dutenez. Unibertsitarioen defendatzailearen erakunde horrek irakasleen, ikasleen eta administrazio eta zerbitzuetako pertsonalaren eskubideen eta askatasunekiko errespetuaren bermatzea du eginkizun, unibertsitateko organo eta zerbitzu ezberdinen ekintza eta jardunetan. Azaroaren 17an Gobernu Kontseiluaren azken bilerak aukeratu zuen Itziar Etxebarria Bilbao Psikologia Fakultateko irakaslea Aldezle izateko Klaustroari proposatzea. Lehenengo bilera horretan EHUren Plan Estrategikoaren oinarriak ere aurkeztuko dira onartuak izan daitezen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun