Getxoko Udaltzaingoak bi lagun atxilotu zituen atzo, asteartea, faltsututako errezetekin Algortako farmazia batzuetan sendagaiak erostea egotzita. Algortako Etorbidetik patruila arruntean ziren tokiko poliziek ikusi zuten espaloi gainetik oinez zihoazen bi gizonezko aldentzen ari zirela, ibilia bizkortuz, agenteak hurreratzen ikustean, udal iturriek adierazi dutenez. Jarrera horren aurrean udaltzainek bi gizonengana hurbiltzea erabaki zuten, beren jarreraren arrazoia ezagutu nahian. Orduan ikusi omen zuten gizonetako batek medikuaren errezetak zituela eskuan. Bigarrenak ere, aldean zeraman galtzarbe-uhal barruan hemeretzi errezeta eta lau kutxa sendagai lasaigarri zituela, antza denez, herriko hainbat farmaziatan erosi berriak. Udaltzaingokoek egiaztatu zuten errezetak hildako mediku malagar batenak zirela eta bere elkargokidearen zenbakia beste pertsona batena zela. Ebidentzia horien aurrean, udal arduradunen arabera, bi gizonezkoek onartu egin zuten errezetak Bilbon “merkatu beltzean” erosi zituztela, bakoitzagatik 5 euro ordainduta. Zer motatako sendagaia den ikusita, uste da “merkatu beltzean” saltzeko zela, substantzia estupefazienteekiko menpekotasun arazo larria duten pertsonei.
Udaltzaingoak faltsututako 4 errezeta berreskuratu zituen, gizonei atzemandakoen oso antzekoak, ustez sendagaiak erosi zituzten farmazietan. Horregatik, poliziek atxilotu egin zituzten gizon biak, ustezko faltsutze delitu batengatik. Gaur goizean bertan epailearen aurrera eraman dituzte, behar bezala identifikatuak izan eta gero.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun