Lehen euskal unibertsitate publikoaren sorreraren 75. urteurrena ospatuko dute bihar Bilbon
Ostegun honetan, abenduak 1, lehen euskal unibertsitate publikoa izandako Universidad Vasca / Euzko Irakastola Nagusiaren sorreraren 75. urteurrena ospatzeko ekitaldia egingo dute. Hitzordua 18:00etan jarri dute, Bizkaia Aretoko Mitxelena gelan (Abandoibarra etorbidea, 3. Bilbo). Lehen unibertsitate hori gaur egungo UPV/EHUren enbrioia izan zen. Ekitaldian parte hartuko dute Iñaki Goirizelaia EHUko errektoreak, Isabel Celaa Eusko Jaurlaritzaren Hezkuntza, Unibertsitate eta Ikerketa sailburuak, eta Bizkaiko, Gipuzkoako eta Arabako ahaldun nagusiek. 1936ko azaroaren 18ko Euzkadiko Agintaritzaren Egunerokoan argitaratu zen Euzko Irakastola Nagusia sortzen zuen dekretua. Ondorioz, Bilboko Ospitale Zibilean, Basurton, Medikuntza Fakultatea (Osakintza Ikastola) martxan jarri zen, garai hartan sortu ahal izan zen fakultate bakarra. 1936ko abenduaren 1ean, orain 75 urte, ikasturtearen irekiera-ekitaldia ospatu zuten. Argazkian, 1937ko Medikuntza Fakultateko ikasleak (Danielle Labajos de Bertolin utzitako argazkia Juan Gondraren bitartez) / © EHU.
Efemeride horren oroipen ekitaldiaren aurkezleak izango dira Gidor Bilbao Euskara eta Eleaniztasun errektoreordea eta Amaia Maseda, Gizarte Erantzukizun eta Unibertsitate Hedakuntzako errektoreordea. Mikel Aizpuru Garaiko Historia saileko zuzendari eta "Amets baten oinordeko gara - Euskal Irakastola Nagusia 1936" erakusketaren komisarioak aurkezpen akademikoa egingo du irudiekin lagunduta. Era berean, Juan Kruz Igerabide idazleak lehen euskal unibertsitate publiko hura errealitate bihurtzea posible egin zuten pertsonen omenezko testu literario bat irakurriko du. Eta Antton Valverde kantautoreak garai hartako poemetan oinarritutako hiru kantu abestuko ditu: "Orixe", "Lizardi" eta "Itauna". Azken hori, Lauaxetak idatzitakoa, dantza talde batekin batera interpretatuko du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun